Սիրիայի ընդդիմադիր և հեղափոխական ուժերի ազգային կոալիցիայի ղեկավար Հադի Ալ-Բահրան Աբու Դաբիում հայտարարել է, որ սիրիական ընդդիմությունը պետք է լինի ահաբեկչության դեմ պայքարի միջազգային ռազմավարության մասը: Այս մասին հայտնում է տեղի WAM գործակալությունը:
«Մենք՝ որպես ընդդիմություն, պայքարում ենք ահաբեկչության դեմ և պատրաստվում ենք այն դուրս բերել Սիրիայից, այդ իսկ պատճառով պետք է լինենք այդ միջազգային ռազմավարության մաս և պետք է երկրում ժողովրդավարություն հաստատենք»,- հայտարարել է Ալ-Բահրան:
Նա հաստատել է նաև, որ Ազգային կոալիցիան բազմաթիվ խոստումներ է ստացել «Իսլամական պետության» դեմ պայքարի համար չափավոր ընդդիմությանը զինելու վերաբերյալ: Ալ-Բահրան հայտարարել է, որ սիրիական ընդդիմությունը մոտ 1 տարի առաջ առաջինն է պայքարի մեջ մտել «Իսլամական պետության» հետ և սիրիական կառավարությանը մեղադրել է խմբավորմանն աջակցելու համար:
Ազգային կոալիցիայի ղեկավարն ԱՄԷ-ում բանակցություններ է անցկացրել արտգործնախարար Մուհամմադ Կարկաշի հետ, որն աջակցություն է հայտնել սիրիացի ժողովրդի օրինական իրավունքներին:
