Տուլայի շրջանում փակվել է երեք թալանողների սպանության գործը: Գյուղական գործարարը, ով դանակը ձեռքին պաշտպանել է իր ընտանիքը, անմեղ է ճանաչվել: Ռուսական պրակտիկայի համար այս դեպքը բացառիկ է, քանի որ սովորաբար այսպիսի գործերը մեղադրական վճռով են ավարտվում:
Հարձակումից 9 ամիս անց էլ Գեղամ Սարգսյանի թոռները չեն կարողանում հանգիստ քնել, ճչում են քնի մեջ: Եվ գործարարը ինքն էլ այդ օրվա իրադարձությունները դժվար թե մոռանա. նրա առանձնատուն էր ներխուժել չորս կողոպտիչ: Զենքով սպառնալով՝ նրանք գումար և թանկարժեք իրեր էին պահանջում: Գեղամ Սարգսյանը, չնայած գործարար է, սակայն հարուստ մարդ չէ:
Տուլայի շրջանի այս ոչ մեծ գյուղում նա միանգամից մի քանի մթերային խանութ ունի: Քննությունը պարզել է, որ հանցագործները համոզված են եղել, որ գործարարի տնից դատարկաձեռն չեն հեռանա: Չի օգնել նաև բացատրելը, որ տանը խոշոր գումար չկա, ամեն ինչ գործի մեջ է դրված:
«Երբ ես հիշում եմ նրանց աղմուկը, աղաղակը, թե ինչպես էին շպրտում երեխաներին, ինչպես յոթ ամսեկան երեխայի ճակատին ատրճանակ էին դրել: Այդ ամենը իրոք սարսափելի էր»,- հիշում է Գեղամ Սարգսյանը:
Այդ սարսափը մի քանի ժամ է շարունակվել: Երբ հանցագործները տակնուվրա են արել տունը և ոչ մի արժեքավոր բան չեն գտել, նրանք որոշել են ազատվել վկաներից: Հասկանալով, որ հիմա ամբողջ ընտանիքին կսպանեն, Գեղամը, արնաքամ լինելով, հասել է խոհանոց և վերցրել դանակը: Թե ինչպես է կարողացել սպանել հանցագործներին, չի հիշում:
«Եթե այս ամենը կրկնվեր, ես ամեն ինչ կանեի այնպես, ինչպես արել եմ: Մի՞թե ես ուրիշ ընտրություն ունեի: Կարծում եմ, որ ամեն ինչ ճիշտ եմ արել»,- ասում է Գեղամը:
Սկզբում երեք անձի սպանությունը որակավորվել էր որպես ինքնապաշտպանության սահմանների անցում: Միայն հիմա՝ ամիսներ անց, Տուլայի հետաքննիչները փակել են Գեղամ Սարգսյանի նկատմամբ քրեական գործը հանցագործության կազմի բացակայության պատճառով:
Ամբողջ գյուղը միաձայն աջակցել է Գեղամ Սարգսյանին:
Գործարարի կինն այժմ հազվադեպ է տանից դուրս գալիս: Նա աշխատում է իր ժամանակը մեծամասամբ թոռների հետ անցկացնել և այդ երեկոն չհիշել:
Հանցագործներից մեկին հաջողվել էր փախչել, երկու ամիս անց նրան բռնել են: Չնայած ապրած ցնցումին, Սարգսյաններն իրենց տան դուռը բաց են պահում. բակում նույնիսկ շուն չկա:
