Հայաստանի հարցով Ղազախստանն ու Ռուսաստանը կուլիսային բանակցություններ են վարում: «Առաջին լրատվական»-ի հետ զրույցում այս մասին ասաց ՌԳԱ Արևելագիտության ինստիտուտի Կենտրոնական Ասիայի, Կովկասի և Ուրալ-Պովոլժիեի ուսումնասիրության կենտրոնի աշխատանքային խմբի համակարգող, ռուսաստանցի քաղաքական վերլուծաբան Ալեքսանդր Սկակովը՝ անդրադառնալով Եվրասիական ինտեգրացիոն նախագծերի ձևավորմանն ու Հայաստանի անդամակցության ճանապարհին առկա խնդիրներին:
Նա նշեց, որ Եվրասիական ինտեգրացիոն նախագծերի ձևավորման ճանապարհին ակնհայտ դժվարություններ կան, դժվարություններ կան նաև Հայաստանի ԵՏՄ անդամակցության հարցում: Դա, ըստ նրա, պայմանավորված է այն հանգամանքով, որ Ադրբեջանը Ղազախստանի միջոցով փորձում է տապալել Հայաստանի ինտեգրման գործընթացը: Ադրբեջանի այդ դիրքորոշումը, նրա մեկնաբանմամբ, պայմանավորված է Հայաստանի ոչ միայն տնտեսական հնարավոր աճով, այլև այդ որոշման դիմաց Ռուսաստանը երաշխավորել է ոչ միայն Հայաստանի, այլև Ղարաբաղի անվտանգությունը, որի համար էլ Ադրբեջանն ամեն ինչ անում է, որպեսզի խափանի Հայաստանի անդամակցության գործընթացը:
«Ես կարծում եմ, որ հիմա կուլիսային երկխոսություն է ընթանում, առևտուր՝ Ղազախստանի ու Ռուսաստանի միջև, Բելառուսի հետ ևս: Եվ կարծում եմ, որ Պուտին-Նազարբաև փոխադարձ սուր հայտարարությունները, թե Ղազախստանը դուրս կգա այդ նախագծերից, կամ Ղազախստանը երբեք պետություն չի եղել, պայմանավորված են սրանով: Սա մի իրավիճակ էր, երբ կուլիսային գործընթացը փոքր-ինչ դուրս ժայթքեց:
Ղազախստանն արդեն իսկ խոչընդոտներ է հարուցում, ու սա ոչ թե Ղազախստանի, այլ Ադրբեջանի քաղաքականությունն է, Ադրբեջանի, որը մեծ ազդեցություն ունի Ղազախստանի նկատմամբ: Բայց կարծում եմ, որ հիմա Պուտինի, Մոսկվայի համար պատվի հարց է, խնդիր է՝ հասնել Հայաստանի ԵՏՄ անդամակցության: Սա Ռուսաստանի համար կարևոր խնդիր է ամեն տեսանկյունից: Ես ամեն դեպքում կարծում եմ, որ Ռուսաստանը կհասնի նրան, որ Հայաստանը դառնա այդ միավորման մի մասը»,- նշեց Սկակովը՝ հավելելով, որ եթե Ալիև-Նազարբաև դուետի հաղթանակի դեպքում կբարձրացվի Հայաստանի և ԼՂ-ի միջև մաքսային անցակետի տեղակայման անհրաժեշտության հարցը, իսկ այդ դեպքում ի՞նչ պետք է լինի Աբխազիայի, Հարավային Օսիայի հետ, կարելի է Ղրիմը ևս հիշատակել… «Եթե Ալիև-Նազարբաև այս պահանջը դրվի Հայաստանի առջև, ապա այն հրամայական պետք է լինի նաև ԵՏՄ մյուս անդամ երկրների համար, իսկ այդ երկրները ևս ունեն նման տարածքային խնդիրներ:
