2013 թվականի առաջին կեսին սիրիացի փախստականների թիվը կարող է հասնել 1 մլն 100 հազարի: Այս մասին հայտնում է REGNUM-ը: Նման հայտարարությամբ հանդես է եկել Փախստականների հարցերով ՄԱԿ-ի գերագույն հանձնակատար Անտոնիու Գուտերեշը:
Դեկտեմբերի 20-ին Փախստականների հարցերով ՄԱԿ-ի վարչությունում կանցկացվի հանդիպում 4 երկրների (այդ երկրներում են ապաստան գտել սիրիացի փախստականները) ոչ կառավարական կազմակերպությունների ներկայացուցիչների մասնակցությամբ: Նրանք կքննարկեն բռնությունից և պատերազմից փախած սիրիացիներին աջակցելու տարածաշրջանային ծրագիրը:
Ինչպես նշել է Գուտերեշը՝ տարածաշրջանային ծրագիրը նախատեսում է մարդասիրական օգնություն ցուցաբերել փախստականներին հենց Սիրիայում և դրա սահմաններից դուրս:
«Սիրիացի փախստականների թիվը այդ տարվա վերջին կկազմի 710 հազար: Մեր կանխատեսումներով՝ մինչև հաջորդ տարվա հունիս այդ թիվը կհասնի 1 մլն 100 հազարի: Դրանից ելնելով՝ մենք պետք է նախապատրաստվենք»,- ընդգծել է նա:
Նշենք, որ ՄԱԿ-ի վերջին տվյալներով՝ հարևան երկրներում սիրիացի փախստականների թիվը գերազանցում է 500 հազարը, իսկ 2.5 միլիոնից ավելի մարդ Սիրիայի ներսում մարդասիրական անհապաղ օգնության կարիք ունի:
