1933թ. այս օրը Երևանում ծնվեց ռադիոֆիզիակայի, ռադիոինժեներության և ռադիոաստղագիտության ոլորտներում հայ գիտնական, աշխարհի մի շարք ակադեմիաների և միջազգային ընկերությունների անդամ, ՀՀ ԳԱԱ ակադեմիկոս, տեխնիկական գիտությունների դոկտոր-պրոֆեսոր Պարիս Հերունին:
Ավարտել է Երևանի Վ. Չկալովի անվան թիվ 30 միջնակարգ դպրոցը, 1951-ին ընդունվել Մոսկվայի Էներգետիկայի ինստիտուտի Ռադիոտեխնիկական ֆակուլտետը: 1957թ. ուսումն ավարտելուց հետո վերադարձել է Հայաստան և որպես ռադիոինժեներ աշխատանքի անցել Բյուրականի աստղադիտարանում: Կարճ ժամանակ անց ստանձնել է Ռադիոֆիզիկական կոնստրուկտորային բաժնի ղեկավարի պաշտոնը:
1960-1968 թթ. Հերունին Հայաստանի ԳԱԱ Ռադիոֆիզիակայի և էլեկտրոնիկայի ինստիտուտում գիտական բաժնի փոխտնօրենն էր, ինչպես նաև ղեկավարում էր Գերբարձր հաճախականությունների բաժինը: 1971-ից մինչ ի մահ ղեկավարել է Հայաստանի Ռադիոֆիզիկայի գիտահետազոտական ինստիտուտը:
Պարիս Հերունին հրապարակել է 340 գիտական աշխատություն և 3 մատենագրություն: Հերունին լուրջ ուսումնասիրություններ է կատարել ոչ միայն ռադիոֆիզիակայի, այլև աստղագիտության ոլորտներում: Նա 4 հեռադիտակների օգնությամբ հետազոտել է աշխարհի ամենահին աստղադիտարաններից մեկը` Քարահունջը (Սյունիքի մարզում) և պարզել, որ այն ավելի քան 7500 տարվա պատմություն ունի: Իր ուսումնասիրությունները Հերունին ամփոփել է «Հայերը և հին Հայաստանը» գիքում:
Պարիս Հերունին մահացել է 2008թ. դեկտեմբերի 5-ին:
