Բուլղարիան ՆԱՏՕ-ին առաջարկել է 3 բազա՝ զորավարժությունների անցկացման համար: ITAR-TASS-ի հաղորդմամբ՝ այս մասին հինգշաբթի օրը հայտնել է երկրի նախագահ Ռոսեն Պլևնելիևը՝ ամփոփելով ՆԱՏՕ-ի գագաթնաժողովի առաջին աշխատանքային օրվա արդյունքները:
«ՆԱՏՕ-ն իր մշտական բազաները չի տեղակայի Բուլղարիայի տարածքում: Բայց մեր երկրի համար շատ կարևոր է անվտանգության հնարավոր սպառնալիքի դեպքում Ռումինիայի և Բուլղարիայի պաշտպանության՝ դաշինքի ընդունած ծրագիրը: ՆԱՏՕ-ին անդամակցության 10 տարիների ընթացքում առաջին անգամ մենք ստացանք կոնկրետ, ստույգ ամրագրված փաստաթուղթ այն մասին, թե ինչ պարտականություններ է ստանձնում դաշինքը Բուլղարիայի կամ Ռումինիայի վրա հարձակման դեպքում»,- ասել է Պլևնելիևը:
Նա նշել է, որ զորավարժությունների անցկացման համար ՆԱՏՕ-ին կառաջարկվեն Նովո Սելո, Կորեն և Շաբլա հրաձգարանները, իսկ պետությունը պարտավորվում է ապահովել «քիչ ավելի ֆինանսավորում», քան ներկայումս հատկացվում է զորավարժությունների կազմակերպման համար:
