Համացանցում հայտնվել են RIM ընկերության BlackBerry 10 օպերացիոն համակարգով նոր սարքի լուսանկարները: Այս մասին հայտնում է compulenta պորտալը:
Հաջորդ սերնդի BlackBerry 10 բջջային օպերացիոն համակարգի շնորհանդեսը տեղի կունենա հունվարի 30-ին: Նույն օրը կներկայացվեն այդ հարթակով աշխատող առաջին սմարթֆոնները՝ սենսորային դիսփլեյներով: Դրանցից մեկը հայտնվել է վիետնամական Tinhte.vn տեխնոբլոգի տրամադրության տակ:
Լուսանկարում պատկերված է BlackBerry 10 L-Series կոմունիկատորը՝ միապաղաղ կորպուսով, որը iPhone է հիշեցնում: Այն ունի 1800 մԱ/ժամ հզորությամբ մարտկոց, MicroHDMI և MicroUSB բնիկներ, NFC չիպի և MicroSD ֆլեշ քարտի տեղադրման հնարավորություն: Նախնական տեղեկությամբ` այն կստանա երկմիջուկանի պրոցեսոր, անլար Wi-Fi կապ և Bluetooth մոդուլներ, GPS նավիգացիոն համակարգի ընդունիչ և երկու տեսախցիկ:
Սենսորային դիսփլեյներով սմարթֆոններից բացի` ընկերությունը մտադիր է ներկայացնել նաև BlackBerry 10 հեռախոսներ՝ QWERTY ստեղնաշարով: Բացի այդ, 2013-ին ծրագրված է նոր օպերացիոն հարթակով բյուջետային սարքերի թողարկում:
BlackBerry 10-ի հիմնական առանձնահատկություններն են BlackBerry Flow մոնիտորը և ծանուցումների միասնական կենտրոնը՝ BlackBerry Hub-ը, որը համախմբում է սոցցանցերի տեղեկությունները, տեքստային հաղորդագրություններն ու էլեկտրոնային նամակները: