Աֆղանստանի նոր նախագահի՝ սեպտեմբերի 2-ին ծրագրված երդմնակալության արարողության նախօրեին երկրում քաղաքական ճգնաժամը հասել է գագաթնակետին, գրում է kommersant.ru-ն: Երկրի նոր ղեկավարի անունը մինչև հիմա հայտնի չէ ձայների վերահաշվարկի պատճառով: Իսկ երկրի ներկայիս ղեկավար Համիդ Կարզայի լիազորությունները նոր նախագահին փոխանցելու համար պաշտոնապես սահմանված ժամկետը սպառվում է հաջորդ երեքշաբթի օրը:
Երկրի նախագահի թեկնածու Աբդուլլա Աբդուլլայի ներկայացուցիչները, որը հայտարարում է զանգվածային կեղծիքների մասին և պնդում, որ ինքն է հաղթել, չորեքշաբթի օրը դադարեցրել են իրենց աշխատանքը Ընտրական անկախ հանձնաժողովում: Նրանց օրինակին է հետևել նախագահի մյուս թեկնածուն՝ Աշրաֆ Գանի Ահմադզայը:
ԱԳՆ նախկին ղեկավար Աբդուլլա Աբդուլլայի ճամբարում վճռական հայտարարություններ են հնչում, որ արմատական սցենարի դեպքում չի կարելի բացառել Աֆղանստանում «զուգահեռ կառավարության» ձևավորման փորձերը:
Աֆղանստանին սպառնացող երկիշխանության վիճակը կտրուկ բարձրացնում է երկրում քաղաքական անկայունության և թալիբների իշխանության վերադառնալու ռիսկը: Աֆղան երկու քաղաքական գործիչների պայքարը նախագահության համար շատ ձեռնտու է թալիբներին, նշվում է kommersant.ru-ի հոդվածում:
