Այսօր Հայաստանի Հանրապետության քաղաքացիներ և շուրջ երեք տասնյակ իրավապաշտպան կազմակերպությունների ներկայացուցիչներ ստանձնեցին պետության պարտավորությունը և կանխեցին Ազատության հրապարակում հացադուլի մեջ գտնվող Հայաստանի Հանրապետության քաղաքացի Րաֆֆի Հովհաննիսյանի կյանքին սպառնացող վտանգը` միասնական ուժերով տեղադրելով հացադուլավորի համար օրենքով չարգելված վրանը:
Երեկ կեսօրին մի շարք հասարակական կազմակերպություններ կոչ էին արել Հայաստանի Հանրապետության գործող Նախագահին ի կատար ածել Մարդու իրավունքների պաշտպանի հայտարարությունը և «ապահովել հացադուլի մեջ գտնվող քաղաքացու համար վրան տեղադրելու` պետության պարտավորության կատարումը մինչև մարտի 23-ը»: Պետության կողմից այդ պարտավորությունը չկատարելու դեպքում քաղաքացիական հասարակության ներկայացուցիչներն իրենք էին խոստացել ստանձնել այն:
Այսօր Ազատության հրապարակում ժամը 18:00-ից սկսեցին հավաքվել հարյուրավոր մարդիկ, ովքեր քաղաքացիական իրավունքն ու պարտքը իրացնելու նպատակով իրենց մասնակցությունն էին բերել հասարակական կազմակերպությունների նախաձեռնությանը: Չնայած ոստիկանական ուժերի մեծաքանակ կուտակմանը և բացահայտ կանխատրամադրվածությանը` թույլ չտալ վրանի տեղադրումը, քաղաքացիները մի քանի շարք օղակների մեջ առան վրանը տեղադրող երիտասարդներին: Վրանի տեղադրման արարողությունն ավարտվեց քաղաքացիների հնչեցրած Հայաստանի Հանրապետության օրհներգի հնչյունների ներքո և «Ազատ, անկախ Հայաստան», «Ազատ, արդար Հայաստան» վանկարկումներով ու եռագույնի ծածանմամբ:
Րաֆֆի Հովհաննիսյանի «Ծոմ Ազատության» ահազանգը, որն արթնացրեց քաղաքացիական ոգին և հանգեցրեց այսօրվա փոքրիկ, բայց կարևոր նվաճմանը, գալիս է փաստելու, որ միասնականությունը, վճռականությունը և քաղաքացիական ակտիվությունն են հզոր պետականության երաշխիքը:
«Ժառանգություն» կուսակցության լրատվական ծառայություն