Երեկ Ծաղկաձորում փակվել է հերթական «Բազե» համահայկական երիտասարդական հավաքը: Իրականում այս շքեղ անվան տակ թաքնված է շատ ավելի պարզ ու հասարակ մի երևույթ: «Բազե» երիտասարդական հավաքը ընդամենը իշխանությունների, այսպես ասած, նոր սերնդի որոնումների մի միջոցառում է, որն իրականացվում է պետական բյուջեի միջոցների հաշվին:
Այսինքն` հայաստանյան սուղ սոցիալական իրականության, 35 տոկոս աղքատության պայմաններում իշխանությունները պետական բյուջեի, հարկատուների հաշվին իրենց համար փնտրում են կարիերիստ երիտասարդների նոր սերունդ, որը կսպասարկի իշխանության գործունեությունը հաջորդ տարիների համար: Պատահական չէ, որ այսօր իշխանական համակարգի, այսպես ասած, ստորոտներում, ինչպես նաև արդեն գագաթներին մոտ կանգնած են մարդիկ, ովքեր աչքի են ընկել հենց «Բազե» հավաքի ժամանակ:
Դեռևս Ռոբերտ Քոչարյանի պաշտոնավարման ընթացքում սկիզբ առած այս երևույթը հաջողությամբ շարունակվում է նաև Սերժ Սարգսյանի պաշտոնավարման ընթացքում:
Մոտ մեկ շաբաթ առաջ «Բազե» հավաքը բացվել է Հովիկ Աբրահամյանի ներկայությամբ: Հովիկ Աբրահամյանն արդեն իրեն նախագահական թեկնածու է երևակայում, և կարող ենք ասել, որ «Բազեն» նրա աչքի տակ արդեն սեփական իշխանության, այսպես ասած, կադրերի բաժնի դերակատարում է ունենալու: Այսինքն` «Բազե 2014»-ը Հովիկ Աբրահամյանի և իշխանությունը պահպանել ցանկացող մյուս պաշտոնյաների համար դառնալու է կադրերի յուրօրինակ տոնավաճառ, որտեղ իշխանությունը կփորձի հավաքագրել իր ապագա նախագահության երիտհենքը: Այլ կերպ ասած` «Բազե 2014»-ը, ըստ էության, դարձավ Հովիկ Աբրահամյանի և իշխանության մյուս թևերի ներկայացուցիչների հավակնությունների բյուջետային սպասարկումը, որը կիրականացվեն, բնականաբար, Սերժ Սարգսյանի, այսպես ասած, թույլտվության պայմաններում, ով ի դեպ երեկ ներկա գտնվեց «Բազե»-ի փակման արարողությանը: Ասել կուզի` «Բազե 2014»-ի հիմնական շահառուն Հովիկ Աբրահամյանն էր ու բոլոր նրանք, ովքեր խնդիր են դրել 2017-2018 ընտրական փուլում այս կամ այն կերպ վերարտադրվել, այսինքն` նրանց բոլորի հավակնությունների համար են դուրս գրվել միլիոնավոր դոլարներ, որոնք կարող էին սոցիալական բազմաթիվ խնդիրներ լուծել:
Հայաստանի առաջ ծառացած ներկայիս տնտեսական ու քաղաքական հսկայական մարտահրավերների և սոցիալական բարդագույն վիճակի պայմաններում մի շարք երիտասարդների հարկատուների հաշվին ուրախ ժամանց ապահովելու որոշումը, մեղմ ասած, խնդիրներ ունի բարոյականության հետ: Այդ երիտասարդները առողջ են, ամուր, պինդ, կենսուրախ, և նրանք պետք է որ իրենք հոգ տանեն իրենց ամառային հանգստի, իրենց ժամանցի մասին` լավ իմանալով, որ Հայաստանում կան մանուկներ, որոնք մի կտոր հացի, տանիքի, հագուստի, առողջության, մի կտոր քաղցրեղենի կարոտ են:
Ահա այս պայմաններում երիտասարդությունը պետք է ըմբոստ լիներ, և ինքը հրաժարվեր իշխանությունների ձեռքին գործիք դառնալուց և պահանջեր պետբյուջեի այդ միջոցներն ուղղել սոցիալական կարիքներին, ուղղել մանուկներին: Սակայն սա էլ, ըստ էության, ցուցիչ է, և պատահական չէ, որ իշխանությունները հենց այս երիտասարդության միջից են ընտրելու իրենց ապագան:
