Wikileaks-ի հիմնադիր Ջուլիան Ասանժը քննարկում է Լոնդոնում Էկվադորի դեսպանատունը լքելու և կամավոր ոստիկանությանը հանձնվելու հնարավորությունը: Այս մասին հայտնում է բրիտանական Sky News հեռուստաալիքը:
Հայտնի է դարձել, որ Ասանժը մտադիր է առաջիկա ժամերին մամուլի ասուլիս անցկացնել, որում նա, ինչպես սպասվում է, կարող է կարևոր հայտարարություն անել:
Վերջին 2 տարին Ասանժը չի լքում Լոնդոնում Էկվադորի դեսպանությունը, որտեղ ապաստան է խնդրել 2012-ի հունիսի 19-ին, որպեսզի խուսափի Շվեդիա արտահանձնումից: Այնտեղ նրան մեղադրում են սեքսուալ բնույթի հանցագործությունների համար: Ասանժը հերքում է իրեն ուղղված բոլոր մեղադրանքները և դրանք համարում քաղաքականապես մոտիվացված: Նա մտավախություն ունի, որ Ստոկհոլմն իրեն ԱՄՆ կարտաքսի, որտեղ նրան սպառնում է մինչև 35 տարվա ազատազրկում լրտեսության և Պետդեպի գաղտնի փաստաթղթերի չարտոնված հրապարակման մեղադրանքով:
Բրիտանիայի իշխանությունները հայտարարել են, որ 43-ամյա Ասանժը կձերբակալվի Էկվադորի դեսպանատնից դուրս գալուց անմիջապես հետո, քանի որ խախտել է դատական գործընթացների ընթացքում գրավով ազատվելու պայմանների վերաբերյալ տեղի դատարանի որոշումը: Դեսպանատան պատերի մոտ շուրջօրյա հսկում է 3 իրավապահ՝ պատրաստ նրան ձերբակալել շենքից դուրս գալուն պես:
