Ռուսաստանը պարզապես չի կարողանա խաղաղապահներ տեղակայել ԼՂ հակամարտության գոտում: Այս մասին այսօր «Առաջին լրատվական»-ի հետ զրույցում ասաց ՀՀ պաշտպանության նախկին փոխնախարար Վահան Շիրխանյանը՝ անդրադառնալով հայ-ադրբեջանական սահմանին և ղարաբաղա-ադրբեջանական հակամարտ զորքերի շփման գծում առկա լարվածությանը և պատերազմի վերսկսման հնարավորությանը:
Նա նշեց, որ պատերազմի վերսկսման վտանգ չկա, թեև՝ այո, շփման գծում այժմ ավելի շատ է լարված իրավիճակը, քան նախկինում, բայց դա նույնպես մենք տեսել ենք ավելի վաղ: Սա չի հանգեցնի պատերազմի վերսկսման: Նրա կարծիքով՝ Սոչիում կայանալիք հանդիպումից հետո շփման գծում ինչ-որ մեղմացում կլինի, քանի որ հակամարտող կողմերի նախագահները որոշակի պարտավորություններ կստանձնեն:
Անդրադառնալով խոսակցություններին, թե ՌԴ նպատակը ԼՂ հակամարտության գոտում խաղաղապահների տեղակայումն է՝ Հարավային Կովկասում սեփական ազդեցության հաստատման համար, նա ասաց, որ այդպիսի դիտարկումներ անողները հաշվարկ չեն արել, թե ինչ է նշանակում խաղաղապահների տեղակայում շփման գոտում:
«Դա հսկայական գիծ է, ՌԴ-ն այս պահին կարո՞ղ է թույլ տալ 15-20 հազար զինվոր տեղակայել այնտեղ: Դա անհնարին է, անպատկերացնելի»,- ասաց Վահան Շիրխանյանը:
Վերջինիս համոզմամբ՝ ադրբեջանական ագրեսիայի պատճառները մի քանիսն են:
«Առաջինը՝ Ադրբեջանն ունի պաշտպանության նոր նախարար, և այդ նախարարը ինքնահաստատման խնդիր ունի: Երկրորդը՝ Ալիևը տարիներ շարունակ ամպագոռգոռ հայտարարություններ է անում, ուզում է դրանք ինչ-որ բանով ամրապնդել, ուստի դա իր հեղինակության խնդիր է: Երրորդը մի քչ ավելի ավելի լուրջ է՝ մարտի միջոցով մեր բանակի մարտունակության հետախուզում, ստուգում: Չորրորը՝ ԵԱՀԿ խմբին շանտաժի միջոցով պարտադրել արագ լուծում ԼՂ խնդրին՝ իհարկե, ադրբեջանանպաստ: Հինգերորդ՝ ապակայունացնել իրավիճակը Ղարաբաղում և Հայաստանում, խոչընդոտել Հայաստանի անդամակցությանը ՄՄ-ին, քանի որ եթե այստեղ անկայուն իրավիճակ լինի, անդամակցության խնդիրը դուրս կգա:
Այս վերջին պատճառը կարող է ունենալ հստակ պատվիրատու՝ ԱՄՆ-ը, որը չի ցանկանում, որպեսզի ՀՀ-ն միանա ՄՄ-ին: Վեցերորդ պատճառը Ադրբեջանի հյուսիսային կողմնորոշումն է»,- ասաց Վահան Շիրխանյանը՝ բացառելով լայնածավալ պատերազմական գործողությունների վերսկսման հնարավորությունը, քանի որ, նրա համոզմամբ, Ադրբեջանն ինքնուրույն, ինքնագլուխ պատերազմ վերսկսել չի կարող: