Երկրապահի վարչության անդամ, քաղաքապետ Տարոն Մարգարյանն այսօր խուսափեց պատասխանել «Առաջին լրատվական»-ի հարցերին, որոնք վերաբերում էին այս օրերին ղարաբաղա-ադրբեջանական շփման գծում առկա լարվածությանը:
Մենք մասնավորապես ուզում էինք պարզել, թե ինչպես է գնահատում երկրապահ քաղաքապետը ստեղծված վիճակը, արդյոք հակամարտության սրման դեպքում պատրաստվո՞ւմ է զենք վերցնել և առաջին գիծ մեկնել: Ընդհանրապես՝ զենք բռնել գիտի՞, թե՞ ոչ, քանի որ հայտնի է՝ նա խուսափել է բանակում ծառայելուց և համալրում է դասալիք ՀՀԿ-ականների շարքերը: Ուզում էինք նաև պարզել, թե ինչպես էր օրերս իրեն զգում քաղաքապետը զինվորական համազգեստով:
Տարոն Մարգարյանն անտեսելով մեր հարցերը՝ հայտարարեց, որ ինքն արդեն իսկ անդրադարձել է այդ հարցերին: Մեր դիտարկմանը, թե մենք այլ հարցեր ունենք, և դրանց չպատասխանելը նշանակո՞ւմ է, որ քաղաքապետը, ով նաև Երկրապահի անդամ է, խուսափում է խոսել շփման գծում ստեղծված վիճակից: Նա նկատեց. «Ես չեմ խուսափում, ես այդ հարցերին պատասխանել եմ, բարի եղեք տեսեք»:
Փաստորեն քաղաքապետի լիազորությունները սահմանափակվում են քաղաքում մի քանի ծաղիկ «շիթիլելով» և խաղաղ պայմաններում կամուֆլյաժով ցուցադրական դիրքեր այցելելով: Հետաքրքիր է՝ ինչո՞ւ այս օրերին, երբ սահմանին կանգնած զինվորն ամենժամյա կրակահերթի տակ է, նույն Տարոն Մարգարյանը «կամուֆլյաժ» չի հագնում և չի բարձրանում դիրքեր: Բայց դա քաղաքապետի համար արդեն շատ բարդ կլինի, քանի որ անգամ ստեղծված վիճակի մասին երկու հոդաբաշխ նախադասություն կազմելն է բարդ նրա համար:
