Հայաստանի հավաքականի և Մոսկվայի «Դինամո»-ի դարպասապահ Ռոման Բերեզովսկին Եվրոպայի լիգայի որակավորման երրորդ փուլի պատասխան խաղում տարած հաղթանակից հետո նշել է, որ այն լավագույն նվերն էր ծննդյան օրվա կապակցությամբ: Հիշեցնենք` Ռոման Բերեզովսկին ծննդյան 40-րդ տարեդարձը նշել է օգոստոսի 5-ին:
«Իհարկե, ցանկալի էր գնդակ բաց չթողնել, բայց գլխավորն այն է, որ հաղթեցինք: Շնորհակալություն երկրպագուներին` աջակցության համար: Մեր երկրպագուներն իմ դարպասի հետևում էին: Հնարավոր է՝ հենց նրանք օգնեցին գնդակ բաց չթողնել երկրորդ խաղակեսում:
Ինչ վերաբերում է երկրորդ խաղակեսի սկզբնամասի դրվագին՝ ապա այնտեղ գոլ չկար: Ես հասցրեցի գնդակը հանել դարպասի գծի վրայից: Այն ամբողջությամբ չէր հատել գիծը»,- Sovsport-ը մեջբերում է Բերեզովսկու խոսքերը:
Հիշեցնենք, որ Եվրոպայի լիգայի որակավորման փուլի փլեյ-օֆֆ ռաունդի վիճակահանությունը տեղի կունենա օգոստոսի 8-ին:
