Այսօր Բաքվի Վերաքննիչ դատարանը մերժել է Խաղաղության ու ժողովրդավարության ինստիտուտի տնօրեն Լեյլա Յունուսի նկատմամբ խափանման միջոցը՝ կալանքը, փոխելու մասին միջնորդությունը: Այս մասին հայտնում է Turan-ը:
Յունուսի փաստաբան Ջավադ Ջավադովի խոսքով՝ Վերաքննիչ դատարանն ուժի մեջ է թողել առաջին ատյանի դատարանի որոշումը, որը նրան կալանավորել է 3 ամսով:
Իսկ օգոստոսի 5-ին կալանավորված Խաղաղության և ժողովրդավարության ինստիտուտի աշխատակից, կոնֆլիկտաբան Արիֆ Յունուսին այսօր տեղափոխել են Բաքվի քննչական մեկուսարան: Այս մասին հայտնում է haqqin.az-ը՝ հղում անելով նրա փաստաբաններին:
Նասիմինի շրջանային դատարանն Արիֆ Յունուսի նկատմամբ որպես խափանման միջոց ընտրել է եռամսյա կալանքը:
Լեյլա Յունուսը մեղադրվում է ՔՕ մի քանի հոդվածով՝ 274 (պետական դավաճանություն), 213 (հարկերից խուսափում), 192 (անօրինական ձեռնարկատիրություն), 320 (փաստաթղթերի կեղծում), 178.3.2 (խոշոր չափի մեքենայություն), իսկ Արիֆ Յունուսին մեղադրանք է առաջադրվել 274 և 178.3.2 հոդվածներով:
