Միջազգային հանրությունը, մասնավորապես ԵԱՀԿ-ն, պետք է նոր ձևով նայեն ղարաբաղյան խնդրի կարգավորմանն ուղղված ջանքերին: Այս մասին է ասվում Հարավային Կովկասի հարցերով ԵԱՀԿ Խորհրդարանական ասամբլեայի հատուկ ներկայացուցիչ Ժոաո Սուարեշի հայտարարության մեջ, որը երեքշաբթի օրը տեղադրվել է կազմակերպության կայքում:
Սուարեշն իր խորը անհանգստությունն է արտահայտել զորքերի շփման գծում և հայ-ադբեջանական սահմանին մահվան փաստերի վերաբերյալ և բոոր կողմերին կոչ է արել կրկին հաստատել խաղաղ կարգավորմանն իրենց հավատարմությունը:
«Անվտանգության պայմանների վատթարացումը և Լեռնային ղաաբաղի շուրջ իրադրության սրումը մեկ անգամ ևս ցուցադրում է, որ խաղաղությունը չի կարող համակերպվել հակամարտության հետ, որը ավելի քան 20 տարի «սառեցված է մնում»: Բոլոր կողմերը պետք է զերծ մնան բռնության ակտերից և սադրանքներից, հատկապես քաղաքացիական անձանց հանդեպ, և արագ կերպով հաստատել դիվանագիտական կարգավորմանն իրենց հավատարմությունը: Հայաստանի և Ադրբեջանի նախագահները պետք է այս շաբաթ Սոչիում հանդիպեն»,- նշել է Սուարեշը:
Նրա խոսքերով՝ միջազգային հանրությունը, մասնավորապես ԵԱՀԿ-ն, պետք է նոր ձևով նայի խնդրի կարգավորմանն ուղղված ջանքերին և նոր գաղափարներ ու մեխանիզմներ քննարկի, որոնք կարող են իրականացվել:
Հատուկ ներկայացուցիչը նշել է նաև վերջերս Բաքվում ավարտված ԽԱ-ի ամենամյա նիստին հայկական պատվիրակության մասնակցությունը և կոչ է արել Հայաստանին և Ադրբեջանին աջակցել խորհրդարանական և այլ ձևաչափերում կառավարությունների և հանրությունների երկխոսությունը: