Եթե Բիձինա Իվանիշվիլին չլիներ, այսօր Վրաստանն ավելի վատ վիճակում կլիներ: Այս մասին երկրի վարչապետ Իրակլի Ղարիբաշվիլին հայտարարել է Բեշումի (Աջարիայի շրջան) կատարած այցելության ժամանակ՝ մեկնաբանելով նախկին նախագահ Միխեիլ Սաակաշվիլիի հայտարարություններն ու Բիձինա Իվանիշվիլիի թեման: Վարչապետի խոսքով՝ Վրաստանում արդարության վերականգնման գործընթացը մինչև վերջ կտարվի, գրում է apsny.ge-ն:
«Ես մեկ անգամ ևս ցանկանում եմ հիշեցնել վրաց ժողովրդին, որ եթե Բիձինա Իվանիշվիլին չլիներ, Վրաստանն այժմ ավելի վատ վիճակում կլիներ, քան Ուկրաինան է: Ես համոզված եմ, որ Միխեիլ Սաակաշվիլիի արկածախնդիր գործողությունների և քաղաքականության պատճառով մեր երկրում իրադրությունը կսրվեր:
Երբ Սաակաշվիլին փախել է երկրից,- նկատի ունեմ 90-ական թվականները,- 20 տարի առաջ Բիձինա Իվանիշվիլին օգնել է մեր երկրին, իսկ 20 տարի մեր երկրի մասին հոգ տանող մարդուն այլ կերպ գնահատել չի կարելի: Նրանք փորձում են խուսափել արդարադատությունից՝ օգտագործելով ցանկացած մեթոդ և հնարավորություն, սակայն եթե հիշենք համաշխարհային պատմությունը, այնպիսի պետություն չկա, որտեղ արդարությունը չի հաղթել: Մենք սկսել ենք արդարադատությունը վերականգնել, և այդ գործընթացը մինչև վերջ կտարվի», – հայտարարել է Իրակլի Ղարիբաշվիլին:
