ԱԺ ՀԱԿ խմբակցության քարտուղար Արամ Մանուկյանն այսօր հնարավորություն չէր ունեցել կառավարությանը հարց ուղղել, բայց հարմար առիթ ունեցավ հարցը հնչեցնելու Հանրային հեռուստաընկերության «Հարցազրույց» ծրագրի եթերում, չնայած հրավիրվել էր բոլորովին այլ թեմաներով խոսելու համար:
Նա անդրադարձել է մարզերից անշարժ հուշարձաններ Երևան բերելուն՝ դա համարելով անընդունելի, քանի որ, ըստ նրա, հուշարձանն արժեք է ներկայացնում իր տեղում:
«Թեղուտում կա հուշարձան և, որպեսզի հանքերի շահագործմանը չխանգարի, բերել են Երևան: Կառավարությունն ասում է, որ հանքերն առաջնահերթ են, մշակույթը խանգարում է հանքերին»,- ասել է ՀՀՇ վարչության նախագահը:
«Ոչ մեկը ոչ մեկին չի սպասում, շատ ակտիվ քաղաքական գործընթացներ են. դա և՛ պառլամենտում է զգացվում, և՛ պառլամենտից դուրս: Այսօր ԲՀԿ-ն, ՀԱԿ-ը, Դաշնակցությունը քննարկումներ են անցկացնում: Միավորիչ եզրերն ավելի շատ են, քան խանգարողները: Ես ամենաշատը կարևորում եմ այն, որ ցանկություն կա միասին աշխատելու: Շատ քաղաքական ուժեր գտնում են, որ միայնակ դժվար է պայքարել, մանավանդ՝ նախագահական ընտրություններում»,- ասել է Արամ Մանուկյանը և հավելել, որ այժմ ոչ թե համագործակցում են, այլ փորձում համագործակցության հիմքեր ստեղծել:
Ընդդիմադիր ուժերին մտահոգող ամենաառաջնահերթ խնդիրը, ըստ նրա, արտագաղթն է, որը իշխանությունը ոչ միայն չի կանխում, այլև նպաստում է ծավալների կրկնապատկմանը՝ ընտրությունների իմաստը դարձնելով անիմաստ: Արամ Մանուկյանը նշել է, որ առաջադրված բոլոր խնդիրները կարող է լուծել 15 ուժերի միասնություն կազմող ՀԱԿ-ը, բայց իրենք քննարկումներ են անցկացնում այլ ուժերի հետ՝ փորձելով միասնական օրակարգ ձևավորել, և եթե կարողանան հասնել միասնական թեկնածուի, ապա արդյունքը լավ կլինի:
ՀԱԿ-ում, նրա խոսքերով, կան անձինք, որ դեմ են այլ թեկնածուի, բայց իրենց մոտ, եթե մեկ հոգի դեմ է, համաձայնություն չի կայացվում, իսկ կայանալու դեպքում բոլորը ենթարկվում են: «Թեկնածուի հարց դեռ չենք քննարկել: Հարցը ոչ թե թեկնածուն է, այլև խնդիրների միասնական քննարկումը: Իսկապես այս քաղաքական ուժերը քաղաքական քննարկման են, ոչ թե անձի շուրջ: Դժվար հասկանալի բան եմ ասում, բայց այսպես է: Երկիրը ձեռքից գնում է: Լևոն Տեր-Պետրոսյանը դեռ չգիտի՝ առաջադրվելո՞ւ է, թե՝ ոչ, ԲՀԿ-ն դեռ չգիտի՝ ում է առաջադրելու»,- ասել է Արամ Մանուկյանը:
