«Ամերիա» ՓԲԸ-ի Հայաստանի արդարադատության նախարարության Դատաիրավական ծրագրերի իրականացման գրասենյակը պետական հիմնարկի պատվերով իրականացնում է «Դատարանների մոնիտորինգ ծառայությունների» ծրագիրը, որը ֆինանսավորում է Համաշխարհային բանկը:
«Դատարանների մոնիտորինգի ծառայություններ» ծրագրի նպատակն է Հայաստանում ներդնել դատարանների մոնիտորինգի համակարգը, որը հնարավորություն կտա միասնական մեթոդաբանության հիման վրա բարձրացնել դատարանների գործունեության արդյունավետությունը, ապահովել թափանցիկություն ու հաշվետվողականություն, դատական տեղեկատվության հասանելիություն, որը կմեծացնի դատական համակարգի նկատմամբ հանրության վստահությունը:
«Ամերիա» խմբի իրավական տնօրեն, «Ամերիայի» իրավական խորհրդատվության ղեկավար Դավիթ Սարգսյանի կարծիքով՝ ծրագրի հիման վրա ձևավորվելիք արդյունքը կնպաստի դատական գործընթացների արագացմանը և արմատավորմանը դատական համակարգում:
«Արդեն իրականացվում է ծրագրի երկրորդ փուլը, որի ընթացքում մենք ներգրավում ենք շահագրգիռ կողմերին, տեղի են ունենում հետաքրքիր քննարկումներ, որի արդյունքում ձևավորվող մոտեցումները հետագայում կարտացոլվեն արդեն եզրափակիչ աշխատանքների փուլում: Եթե կա պատշաճ մոնիտորինգ և պատշաճ հաշվետվողականություն, դա բերում է մոնիտորինգի տակ գտնվող սուբյեկտի` դատավորների, դատարանների գործունեության արդյունավետության, դրա ավելի պարզ լինելուն այն հաճախորդների համար, ովքեր օգտվում են դատական համակարգից»:
Արդարադատության նախարարության դատաիրավական ծրագրերի գրասենյակի տնօրեն Արթուր Թունյանի խոսքով՝ պետությանը, դատական համակարգին անհրաժեշտ են այլ գործիքներ դատարանների գործունեությանը հետևելու, բացերը վեր հանելու, որոշակի լուծումներ գտնելու միջոցով այդ ոլորտը ավելի արդյունավետ դարձնելու համար. «Մոնիտորինգը հնարավորություն կտա տեսնել, թե
դատարանը, դատավորը կոնկրետ քանի գործ քննեց, արդյոք պետական միջոցները, որոնք տրամադրվում են դատարանին, արդյունավե՞տ են ծախսվել, թե՞ ոչ»,- լրագրողների հետ զրույցում ասաց նա:
