ՌԴ Նիժնի Նովգորոդ մարզի բնակիչ, 11-ամյա Ֆելիքս Քարամյանը դարձել է իտալացի երգիչ Ռոբերտինո Լորետտիի առաջին աշակերտը: Իտալացի երգիչը 15 տարեկան էր, երբ կատարեց «Anema e core» երգը: Այժմ «Հոգու և սրտի» մասին երգել նա սովորեցրել է դեռահաս տղային: Դպրոցականը անհատական վարպետության դասեր է անցել լեգենդար երգչի մոտ: Այս մասին հաղորդում է Vesti-ն:
Բազմաթիվ միջազգային մրցույթների դափնեկիր Ֆելիքսի երգը Լորետտին անձամբ է լսել համացանցում և նրան հրավիրել Կիևում համեգի, որտեղ նրան է նվիրել իր «Amore» երգը: Մեկ տարի անց՝ այս ամռանը, արդեն երկու երգիչ հանդես են եկել մեկ բեմում, ինչից հետո իտալացին որոշել է Ֆելիքսին փոխանցել իր վոկալ վարպետության գաղտնիքները, նրան վարպետության դասերի հրավիրել: Մաեստրոն իր իրավահաջորդին սովորեցրել է «Յամայկան» երգել ոչ միայն գեղեցիկ, այլև գրագետ:
Ֆելիքսի հայրը՝ Վարդան Քարամյանը կարծում է, որ «Ռուսաստանում ոչ մի տղա, Ֆելիքսից բացի, ճիշտ չի երգում այդ երգը»: «Ես, որպես հայր, հպարտանում եմ, որ իմ որդին առաջինն է դիպլոմ ստացել անձամբ Ռոբերտինո Լորետտիից»:
6 օր, օրական 6 ժամ անընդմեջ երգեցողություն հանրահայտ երգչի հետ: Ֆելիքսը պատմում է, որ այդ եզակի հանդիպումից նա փորձել է վերցնել առավելագույնը, և նույնիսկ նա անձամբ է ուսուցիչ դարձել հռչակավոր երգչի համար: Տղան պատմել է, որ Ռոբերտինոյին դոմինո խաղալու է հրավիրել, իսկ նա ասել է, որ չգիտի, թե դա ինչ խաղ է: Ֆելիքսը նրան սովորեցրել է, և միասին սկսել են խաղալ:
Ռոբերտինո Լորետտիի վարպետության դասերն անցնելու մասին հավաստագիրը զարդարում է երիտասարդ երգչի սենյակը: Ֆելիքսը կրկին կերգի իր անվանի ուսուցչի հետ նույն բեմում: Հաջորդ տարի Ֆինլանդիայում ծրագրված է 3 համերգ:
Հավանաբար հաջորդ տարի Ռոբերտինո Լորետտին հանդես կգա Նիժնի Նովգորոդում՝ որպես նվեր իր առաջին և միակ աշակերտին: Գարնանը առաջին անգամ սիմֆոնիկ նվագախմբի ուղեկցությամբ հարազատ բեմ կբարձրանա նաև Ֆելիքսը, սակայն իտալացի մաեստրոյի մոտ ևս մեկ վարպետության դաս անցնելուց հետո: