«Նոր ալիք-2014» փոփ երաժշտության երիտասարդ կատարողների միջազգային մրցույթի «Հանդիսատեսի համակրանք» մրցանակն այսօր երեկոյան Յուրմալայում (Լատվիա) մրցույթի փակմանը նվիրված գալա-համերգի ժամանակ կհանձնվի Հայաստանը ներկայացնող 20-ամյա Սոնա Ռուբենյանին:
Ըստ մրցույթի կայքէջի, քվեարկության արդյունքներն ամփոփված են: Ս.Ռուբենյանի օգտին գրանցվել է 19 370 ձայն: Ղազախստանի ներկայացուցիչ Ալիշեր Քարիմովը ստացել է 18 158, իսկ Լիտվայի ներկայացուցիչ Մոնիկա Լինկիտեն՝ 16 324 ձայն:
Ավելի վաղ «Փաստինֆո»-ն տեղեկացրել էր, որ այսօր Յուրմալայում կհրապարակվեն հուլիսի 23-ից մեկնարկած այս մրցույթի հաղթողների, նաև «Հանդիսատեսի համակրանք» մրցանակին և հատուկ մրցանակներին արժանացած մասնակիցների անունները:
Երեք մրցութային օրերի արդյունքներով Սոնա Ռուբենյանը զբաղեցրեց 6-րդ հորիզոնականը (220 միավոր):
Մրցույթի հաղթողը Վրաստանի ներկայացուցիչ Նուցա Բուզալաձեն է (228), երկրորդ և երրորդ հորիզոնականներում՝ Ուկրաինայի ներկայացուցիչներ Վիկտորիա Պետրիկն ու Վյաչեսլավ Ռիբիկովն են` համապատասխանաբար 226 և 224 միավորներով:
Մրցույթին այս տարի մասնակցում են 13 երկրների 16 ներկայացուցիչներ:
Սոնան առաջին մրցութային օրը, որը նվիրված էր համաշխարհային հիթերին, կատարեց Մայլի Սայրուսի «Wrecking ball»-ը: Մրցութային երկրորդ օրը՝ հուլիսի 24-ին, մասնակիցները կատարեցին իրենց երկրների հիթերը: Սոնան «Նոր ալիք»-ի նախորդ տարիներին մասնակցած երգիչ Մհերի հետ փայլուն կատարեց Արմեն Սմբատյանի «Հայաստան» երգը, որն, ինչպես ասել էր Սոնան, նվիրում է Հայոց ցեղասպանության 100-րդ տարելիցին: Նախօրեին՝ մրցութային երրորդ օրը, Սոնան որպես հեղինակային երգ ընտրել էր Մանե Հակոբյանի և Ազատ Հակոբյանի «Կարոտ» երգը, որի կատարման համար արժանացավ ժյուրիի բոլոր 7 անդամների ամենաբարձր՝ 11 գնահատականին: Չնայած սրան և երկրորդ օրվա բարձր գնահատականներին, ցավոք, Սոնան չկարողացավ զբաղեցնել ավելի բարձր տեղ՝ առաջին օրը ակնհայտորեն ավելի ցածր դրված միավորների պատճառով:
