«Թիվ 1 ընտրատարածքում անցկացված ընտրությունների վերաբերյալ ավելացնելու բան չկա, երբ ՀՀ քաղաքացին իր իրավունքների տերը լինի, երկիրը կփոխվի: Եթե ՀՀ-ում ընտրություններն այսկերպ շարունակվեն, ՀՀ-ում ոչ մի փոփոխություն հնարավոր չէ արձանագրել». այսօր լրագրողների հետ հանդիպման ժամանակ այս մասին ասաց «Ժառանգություն» կուսակցության անդամ Անահիտ Բախշյանը՝ հորդորելով հասարակությանն ուշքի գալ:
Ըստ նրա՝ թիվ 1 ընտրատարածքում, հազար ու մի ձևով պետական ռեսուրսներն օգտագործելով, ընտրեցին քաղաքապետի աներձագին: Այս ամենը, նրա համոզմամբ, իշխանության թուլության մասին է խոսում, այն մասին, որ իշխանությունն այն աստիճան է թուլացել, որ մի կոճակ սեղմող ավելացնելու համար այս ամենին գնաց: «Կարող էր թույլ տալ ժողովրդին, որ գնային ընտրեին՝ ում ուզում էին: Մարդկանց բարձր մասնակցություն չգրանցվեց ընտրություններին, քանի որ մարդիկ հույսը կորցրել են, հավատը կորցրել են, իրենք իրենց քաղաքացի չեն համարում»,- նկատեց Անահիտ Բախշյանը:
Համատեղ ասուլիսի ընթացքում ՀՀԿ-ական պատգամավոր Մարգարիտ Եսայանն ասաց, որ զարմանում է ընդդիմության զարմանքի վրա: Նրա կարծիքով՝ որևէ մեկի համար զարմանալի չպետք է լիներ, որ իշխող քաղաքական ուժը, բնականաբար, շատ ավելի մեծաթիվ է հնարավորություններ ունի, այն դեպքում, երբ այդ նույն համայնքում թաղապետ էր աշխատել գործող քաղաքապետ Տարոն Մարգարյանը: Իսկ պատգամավորի համոզմամբ, աներձագ լինելը մեղք կամ քաղաքական կատեգորիա չէ:
«Կան բարեկամական կապեր, ես համոզված եմ, որ ներկայիս ընդդիմությունը, եթե իշխանություն լիներ, այդ մանդատը վերցնելու էր: Ինչո՞ւ պետք է իշխանությունը ժեստ աներ, հանրապետական կառույցն ուժեղ է Ավանում, բնականաբար, պետք է հաղթեր այդ քաղաքական ուժի թեկնածուն: Ինչո՞ւ եք զարմանում, որ ընտրվել է ուժեղ կառույցի թեկնածուն: Այդ պայքարի արդյունքում հաղթել է Հանրապետականի գաղափարախոսությունը կրող քաղաքական գործիչը»,- մեկնաբանեց Մարգարիտ Եսայանը:
Դիտարկմանը, թե Հանրապետական թեկնածուն երբեք չխոսեց՝ նա արձագանքեց՝ ասելով, որ երբեմն լռությունը շատ ավելի խոսուն է լինում: «Եթե ընտրողները հավաքվեն և ասեն, որ այդ ընտրությունը չեն կատարել՝ գուցե համաձայն լինեի, բայց այսօր այդքան մարդ ընտրել է Ռոբերտ Սարգսյանին, և նրանց ընտրությունը պետք է հարգել»,- կարծիք հայտնեց պատգամավորը:
