2006 թվականին Լոնդոնում մահացած, ՌԴ անվտանգության դաշնային ծառայության նախկին սպա Ալեքսանդր Լիտվինենկոյի այրին՝ Մարինան, խնդրում է օգնել իրեն գումար հավաքել ամուսնու մահվան գործով քննության համար իրավաբանական թիմին վճարելու նպատակով: Բանն այն է, որ Բորիս Բերեզովսկին այլևս չի կարող նրանց ֆինանսական օգնություն ցուցաբերել: Մարինայի ուղերձով տեսանյութը երկուշաբթի իր կայքում տեղադրել է Guardian-ը:
Հավանաբար, հետաքննությունը կսկսվի հաջորդ տարվա գարնանը և 2-3 ամիս կպահանջի: Հետաքննչական մարմինը ֆինանսավորվում է բրիտանացի հարկատուների հաշվին, սակայն Լիտվինենկոյի ընտանիքը պետք է վճարի իր 3 հոգանոց թիմի աշխատանքի համար: «Հարցաքննության համար ես շատ լավ թիմ ունեմ, ես ցանկանում եմ պահպանել այն, քանի որ այդ մարդիկ կօգնեն ինձ պարզել, թե ո՞վ է կանգնած այդ հանացործության հետևում, դրա հետևում կանգնա՞ծ է արդյոք ռուսական պետությունը: Առանց այդ թիմի ես չեմ կարող դա անել»,- ասել է Լիտվինենկոյի այրին:
Նա հավելել է, որ իր ամուսնու մահվան հանգամանքների պարզաբանումը հասարակական կարևոր գործ է,այլ ոչ իր անձնական հետաքրքրությունը:
Միջոցները կհավաքվեն Litvinenko Justice Foundation նոր բարեգործական հիմնադրամի հաշվին։
2000 թվականին Մեծ Բրիտանիա փախած Լիտվինենկոն մահկանացուն կնքել է 2006-ի նոյեմբերի 23-ին՝ կյանքի 44-րդ տարում: Դա տեղի է ունեցել իր նախկին գործընկերներ Անդրեյ Լուգովի և Դմիտրի Կովտունի հետ հանդիպումից և Millennium հյուրանոցում թեյախմությունից հետո: Սպայի մահվանից հետո բրիտանացի մասնագետները հայտարարել էին, որ նրա օրգանիզմում մեծ քանակության ռադիոակտիվ տարր են հայտնաբերել՝ պոլոնիում-210: Հերձումից հետո պաշտոնական բժշկական եզրակացությունը դեռևս չի հրապարակվել:
