Կենտրոն և Նորք-Մարաշ վարչական շրջանների ընդհանուր իրավասության դատարանում Մեսրոպ Մակյանի նախագահությամբ շարունակվեց Էդգար Վարագյանի գործի դատական քննությունը:
Ըստ մեղադրանքի՝ 28-ամյա արթիկցի, նախկին ոստիկան Էդգար Վարագյանը 2013 թվականի սեպտեմբերի 22-ին կոտրել է Նորքում բնակվող Քրիստինեի (անունը փոխված է) տան պատուհանի ապակին, դիմակավորված մուտք է գործել տուն, իր մոտ եղած, որպես զենք օգտագործված խաղալիք ատրճանակով և իսկական դանակով բռնություն է գործադրել, հարձակվել Քրիստինեի ու նրա անչափահաս դստեր՝ 2000 թվականի նոյեմբերին ծնված Կարինայի (անունը փոխված է) վրա:
Տուժողների դիմադրությունը կանխելու նպատակով Էդգարը պատիճավոր պղպեղի լուծամզվածք է փչել նրանց դեմքերին, ինչից նրանց աչքերը մռմռացել են:
Էդգարը Քրիստինեի ձեռքերը կապել է ձեռնաշղթայով, Կարինայի ձեռքերը՝ կպչուն ժապավենով, ու պահանջել է տանը եղած ոսկեղենն ու հինգ հազար դոլար:
Վարագյանը, առաջադրված մեղադրանքի համաձայն, ավազակային հարձակմամբ հափշտակել է 4 միլիոն 127 հազար 396 դրամի գույք:
Դրանով չբավարարվելով՝ Վարագյանը ատրճանակի ու դանակի գործադրմամբ Քրիստինեին ու նրա դստերը մտցրել է նրանց իսկ ավտոմեքենայի բեռնախցիկը, առանց հափշտակելու նպատակի տիրացել է այդ ավտոմեքենային՝ բացահայտ առևանգելով տուժողներին:
Նա տուժողներին տեղափոխել է Կոտայքի մարզի Ձորաղբյուր գյուղի մերձակա ամայի դաշտ, բեռնախցիկից դուրս է բերել Քրիստինեին, նրա նկատմամբ կատարել է բռնի սեքսուալ գործողություններ, հետո կնոջ կամքին հակառակ սեռական հարաբերություն է ունեցել հետը:
Այդքանից հետո Էդգար Վարագյանը անչափահաս աղջկան էլ է հանել մեքենայի բեռնախցից, մորն ու դստերը թողել է դաշտում, իսկ ինքը նրանց մեքենայով հեռացել է՝ հետագայում մեքենան թողնելով Երևանի Քանաքեռ թաղամասում:
Էդգար Վարագյանին առաջադրված մեղադրանքների ցանկը երկար է՝ ՀՀ քրեական օրենսգրքի 138 հոդվածի 1-ին մասով, 175 հոդվածի 3-րդ մասի 1-ին, 183 հոդվածի 3-րդ մասի 3-րդ, 131 հոդվածի 2-րդ մասի 2-րդ կետերով և 139 հոդվածի 1-ին մասով:
Գործի դատական քննության մի մասը անցկացվել է դռնփակ պայմաններում: Այդպես անցած նիստին հարցաքննվեց նաև պաշտպանության կողմի վկա, Էդգարի մտերմուհի Հ.-ն, ով ներկայացել էր հաստատելու համար Էդգար Վարագյանի այլուրեքությունը. կինը դատարանում պնդել է, թե հանցագործության կատարման ժամանակ ինքը Էդգարի հետ եղել է նրա տանը, գիշերել է այնտեղ:
Ըստ Էդգարի պնդման՝ նախաքննության ժամանակ այս կնոջը հարցաքննելիս քննիչը միտումնավոր կերպով նրան ցույց է տվել Էդգարի լուսանկարները՝ այլ կնոջ հետ, խանդ է առաջացրել, և կինը նախաքննության ժամանակ չի հաստատել Վարագյանի այլուրեքությունը:
Երեկ Էդգարի հարազատները հիշատակում էին նաև բանկի մի աշխատակցուհու, ով դատարանում ցուցմունք է տվել, թե Էդգարի հետ ինտիմ կապի մեջ է եղել, բայց իրականում Էդգարը նրանց տուն է գնացել այդ կնոջ աղջկան սիրահետելու նպատակով…
Ըստ հարազատների՝ ոչ թե Քրիստինեն է տուժող, այլ՝ իրենք, իսկ Քրիստինեն Էդգարին զրպարտել է, որ նրանից գումարներ ստանա…
Այսօր հարցաքննվեց կանանց հետ կապերի ու այլ խնդիրների մեջ հայտնված ամբաստանյալ Էդգար Վարագյանը:
Նա հայտարարեց, թե իր նախկին պաշտպան Աննա Թամազյանը չի թողել, որ տուժողի հարցաքննության ժամանակ ինքն իր ունեցած բազմաթիվ հարցերը տա տուժողին, և ցանկացավ հնչեցնել այդ հարցերը:
Մեղադրողն առարկեց, որ այս փուլում տուժողը լրացուցիչ հարցաքննվի: Դա, ըստ մեղադրողի, կարող էր արվել ամբաստանյալի հարցաքննությունից հետո:
Պաշտպան Արայիկ Ալվանդյանը կողմ արտահայտվեց իր պաշտպանյալի միջնորդությանը՝ ասելով, որ կան հանգամանքներ, որոնք պետք է ճշտվեն, որից հետո ամբաստանյալը ցուցմունք կտա:
Նախագահողը բավարարեց ամբաստանյալի միջնորդությունը՝ քննության ամբողջականությունն ու լրիվությունը ապահովելու պատճառաբանությամբ:
Վարագյանը հարցրեց՝ իրականում տուժողը հասկանո՞ւմ է հայերեն: Տուժողն ասաց, թե մինչև այժմ ցուցմունքներ է տվել հայերեն:
Տուժողն ասաց, թե երկուսից չորս ամիս է աշխատել Վարագյանն իր տանը՝ որպես նորոգող: Ինքը նախապես է վճարել, ոչինչ պարտք չի մնացել:
Ինքը մեկ անգամ եղել է Վարագյանի տանը՝ իր աղջկա հետ, տասը րոպե են մնացել այնտեղ:
Երկու հողատարածք ունի տուժողը:
Նունուֆարը՝ իր շինարարը խաբել է, իրեն հասցրել դատարան, հիմա վճռաբեկը քաղաքացիական գործը հետ է ուղարկել ընդհանուր իրավասության դատարան:
Նունուֆարին ինքը չի վախեցրել: Իր ունեցվածքի և Նունուֆարի ունեցվածքի վրա կալանք դրված է՝ դատական վեճ ունենալու պատճառով:
Հարևանների հետ խնդիրներ չունի:
Քննիչին ինքն է ասել, որ Էդոն է կատարել հանցագործությունը՝ նկատի ունենալով հենց Էդգար Վարագյանին:
Էդգարը հարցրեց՝ տուժողն իր ծնողներին զանգել ու պահանջե՞լ է 500 հազար դոլար կամ՝ տունը դարձնել իր անունով, որ բողոքը հետ վերցնի:
Տուժողը պատասխանեց, որ Էդգարի հարազատները հարձակվել են իր վրա, պահանջել են, որ բողոքը հետ վերցնի:
Պաշտպանը հարցրեց՝ տուժողի երկու հողամասերը և դեպքի վայրը մո՞տ են:
«Ոչ, անծանոթ վայր էր»,- դեպքի վայրի մասին ասաց տուժողը:
Էդգար Վարագյանը ամենայն մանրամասնությամբ սկսեց պատմել իր կյանքի պատմությունը:
Արթիկում է ծնվել, սովորել է Արթիկի պետական քոլեջում՝ գործով անցնող Գևորգ Չ.-ի հետ: Երաժշտական դպրոց էլ է գնացել, հետագայում որպես երաժիշտ՝ նվագել է տարբեր ռեստորաններում:
Պարբերաբար վիճաբանել է Գևորգ Չ.-ի հետ, հիասթափվել նրանից, բայց շարունակել է նրա հետ գործ բռնել:
Բանակ է մեկնել, ծառայել նվագախմբում, նվագախմբի ղեկավար է եղել: 2005-ին զորացրվել է, քոլեջում ուսումը շարունակել:
Հետո ընդունվել է ագրարային համալսարան, միաժամանակ նվագել է տարբեր ռեստորաններում: Կարիքի մեջ չի եղել:
«Ալմաստ» գործարանի մոտ ախալքալաքցի ընկերոջ ավտոլվացման, ավտոտեխսպասարկման կետում տնօրենի օգնական է եղել: Ոչ մի աշխատանքից խույս չի տվել:
Երբ իր կողմից չհարգված Գևորգ Չ.-ն առաջարկել է նորոգման աշխատանքներ կատարել մի պարսկահայի տանը՝ Նորքում, համաձայնել է:
Այդպես ծանոթացել է տուժող Քրիստինեի հետ:
Իր ընկերների հետ հարդարման աշխատանքներ է կատարել Քրիստինեի տանը: Քրիստինեն առանձնապես վճարել չի սիրել, տվել է ուտելիքի գումար, ինչպես նաև աշխատելու առաջին ամսվա գումարը:
Հետո չի վճարել:
Նա չի վճարել նաև իր տանն աշխատող մյուս արհեստավորներին: Բոլորը վիճել են Քրիստինեի հետ ու գործը թողել-հեռացել են:
Բոլոր դեպքերում Քրիստինեն դրել է իր «դերասանական լացուկոծը», Էդգարի մեղքն էլ եկել է: Պատահել է՝ նա իր գրպանից է գումար վճարել, միայն թե Քրիստինեն չվիճի արհեստավորների հետ:
Այդ պայմաններում Էդգարը համաձայնել է կառուցել նաև Քրիստինեի տան պարիսպը ու դրա համար անհրաժեշտ քարը Քրիստինեի խնդրանքով գնել է իր փողով. այդ գումարը իրեն ուղարկել էին հարազատները, որ ուսման վարձը վճարի:
«Չեմ ուզում չակերտները շատ բացել, բայց մեր մեջ մոտիկություն կար»,- բազմանշանակ ասաց Էդգարը:
Իր ուսման վարձով վճարելով Քրիստինեի շինանյութի համար՝քարը Արթիկից Կամազով բերել, նրա տան մոտ բեռնաթափել է:
Քրիստինեն հավաստիացրել է, թե մի քանի օր հետո գումարը կտա:
Մի օր էլ եկել են ԴԱՀԿ աշխատողներն ու արգելել են Քրիստինեի տանը շինարարական աշխատանք կատարել՝ ասելով, թե տունը դատական խնդիրների մեջ է, չի թույլատրվում շինարարություն կատարել:
Էդգարն ու ընկերները հաշվել են, թե ինչ աշխատանք են կատարել, ինչքան պիտի վճարի Քրիստինեն: Վերջինս ասել է, թե տվյալ պահին գումար չունի, բայց շուտով կվճարի:
Անցել են օրեր, ամիսներ, սակայն նա այդպես էլ, ըստ Էդգարի, չի վճարել, շարունակ խաբել է:
2009 թվի աշնանը Գևորգ Չ-ն ասել է, որ էլ գումար չպահանջեն Քրիստինեից, նրան չանհանգստացնեն: Իբր՝ ինքը ոստիկանության ու պաշտպանության համակարգերում բարեկամ պաշտոնյաներ ունի, նրանց միջոցով գումարը կստանա:
Ձմռանը Էդգարը մեկնել է Եվրոպա: Ասել է՝ գումար որ տա Քրիստինեն, մորս կփոխանցեք:
Վերադարձել է, իմացել, որ Քրիստինեն գումար չի տվել:
Գևորգ Չ.-ն հանդիպում է կազմակերպել հանցավոր աշխարհում «անուն ունեցող» մի տղայի՝ Անուշավանի հետ, ով պահանջել է Քրիստինեին այլևս չանհանգստացնել: Բայց նա այդպես է պահանջել Գևորգի ստերի պատճառով…
Քրիստինեին էլ է հանդիպել Էդգարը: Քրիստինեն ամուսնու հետ է եղել, թաքուն հասկացրել է Էդգարին, թե չի ուզում, որ ամուսինը իրենց գործերի մասին իմանա…
Էդգարի մանրակրկիտ ցուցմունքի ընթացքում տուժող Քրիստինեն շարունակ նշումներ էր անում ու տարուբերում գլուխը:
Էդգարը այնքան խորացավ մանրամասնությունների մեջ, որ մինչև աշխատանքային օրվա ավարտը չհասցրեց հասնել դեպքի օրվա իրադարձություններին:
Նա կշարունակի ցուցմունք տալ հաջորդ նիստին՝ հուլիսի 31-ին:
