«Հասարակություն առանց բռնության» ՀԿ-ն, կարևորելով կանանց նկատմամբ բռնությունների դեմ պայքարը Հայաստանում, «Գենդերային հիմքով բռնության դեմ ակտիվության 16-օրյակ»-ի շրջանակներում իրականացնում է խոշոր հանրային միջոցառում «Ընտանեկան բռնությունը՝ որպես ամուր ընտանիքի հիմք» խորագրով: Ակցիան նպատակ ունի հասարակության լայն շերտերին իրազեկել կանանց նկատմամբ բռնության տարածվածության և ընտանեկան բռնության 4 դեպքերի մասին և բարձրացնել այն հարցը, թե արդյոք ընտանեկան բռնությունը ազգային ավանդույթ է և մի երևույթ, որը պետք է մնա տան 4 պատերի ներսում:
Հաշվի առնելով նաև այն փաստը, որ նոյեմբերի 30-ին Արարատի և Վայոց Ձորի ընդհանուր իրավասության դատարանը կայացրել է դատավճիռ ընտանեկան բռնության զոհ Մարիամ Գևորգյանի գործով և որոշել Մարիամին դաժան խոշտանգումների և ծեծի ենթարկած սկեսուրի՝ Հայկանուշ Միքայելյանի հանդեպ բավականին մեղմ պատիժ սահմանել՝ ակցիան անդրադառնալու է նաև Մարիամ Գևորգյանի գործով վճռին՝ բարձրացնելով այն մտահոգությունը, որ ընտանեկան բռնության օրենքի բացակայությունը հանգեցնում է դժգոհության մեծ ալիք բարձրացնող նմանօրինակ դատավճիռների կայացմանը:
Միջոցառումը տեղի կունենա դեկտեմբերի 3-ին ժամը 15:30-ին Շառլ Ազնավուրի հրապարակում՝ «Մոսկվա» կինոթատրոնի դիմաց:
«Հասարակություն առանց բռնության» ՀԿ-ն հորդորում է զանգվածային լրատվական միջոցներին՝ ներկա գտնվելու այս հույժ կարևոր միջոցառմանը, ինչպես նաև հանրությանը տարածելու միջոցառման մասին տեղեկատվությունը, քանի որ միայն իրազեկվածության բարձրացման դեպքում բռնությունների թիվը Հայաստանում կսկսի նվազել: Միևնույն ժամանակ խրախուսում են ՀՀ ոչ անտարբեր քաղաքացիների մասնակցությունը՝ միասին բողոքի ձայն բարձրացնելու ընտանեկան բռնությունների դեմ:
