«Հայկական ժամանակ» օրաթերթի գլխավոր խմբագիր, քաղբանտարկյալ Նիկոլ Փաշինյանի փաստաբան Վահե Գրիգորյանը երեկ մամուլի ասուլիսում ահազանգ հնչեցրեց` կապված «Արթիկ» քրեակատարողական հիմնարկի վարչակազմի կողմից Նիկոլ Փաշինյանի նամակագրությունն անօրինական ձևով արգելելու խնդրի հետ. պաշտպանական կողմի պնդմամբ` ամեն օր ոտնահարվում է «Արթիկ» ՔԿՀ-ում պահվող Նիկոլ Փաշինյանի` նամակագրություն վարելու սահմանադրական իրավունքը, իսկ փետրվարի 24-ից հետո այդ իրավունքից զրկելու միջոցներն ավելի են խստացվել: Մասնավորապես, ըստ փաստաբանի, եթե նախկինում «Հայկական ժամանակ» օրաթերթին ուղարկված Փաշինյանի նամակները հանձնվում էին «Արթիկ» ՔԿՀ-ի վարչակազմին և պարզապես չէին ուղարկվում «Հայկական ժամանակ», ապա այժմ Փաշինյանին ընդհանրապես թույլ չեն տալիս գրիչ վերցնել և որևէ բան գրել:
ՔԿՀ-ի աշխատակիցներից որևէ մեկը մշտապես ներկա է գտնվում Նիկոլ Փաշինյանի և նրա պաշտպանի հանդիպմանը, թույլ չեն տալիս առանձնազրույց ունենալ, մշտապես հսկում են, լսում, նույնիսկ միջամտում, իսկ երբ նա փորձում է գրիչով ինչ-որ բան գրել, գրենական պիտույքն անմիջապես վերցնում են ձեռքից կամ արգելում փաստաբանի հետ հանդիպումը: Ուստի, պաշտպանը հորդորեց լրագրողներին` ամեն օր հետաքրքրվել` նրա նամակը հասե՞լ է հասցեատիրոջը, թե՞ ոչ:
Ըստ պաշտպանի` նամակները թաքցնելու նպատակը գործի հետ կապված հնարավոր զարգացումներին և պաշտպանական կողմի հետագա քայլերին ծանոթանալն է: Հիշեցնենք, որ 2010 թվականի դեկտեմբերից, երբ Նիկոլ Փաշինյանը «Կոշ» ՔԿՀ-ում դիմակավորված անձանց կողմից քնած ժամանակ հարձակման ենթարկվելուց հետո տեղափոխվեց «Արթիկ» ՔԿՀ, Փաշինյանի ծրարները «Արթիկ» ՔԿՀ-ի վարչակազմը կամ չի ընդունում, կամ ընդունում է ու չի փոխանցում փոստային բաժանմունքին` հասցեատերերին ուղարկելու նպատակով:
Սույն գործողությամբ ոտնահարվում է ՀՀ Սահմանադրության 23-րդ հոդվածի 4-րդ պարբերությունը, ըստ որի յուրաքանչյուր ոք ունի նամակագրության, հեռախոսային խոսակցությունների, փոստային, հեռագրական և այլ հաղորդումների գաղտնիության իրավունք, որը կարող է սահմանափակվել միայն օրենքով սահմանված դեպքերում և կարգով, դատարանի որոշմամբ, ՀՀ Քրեակատարողական օրենսգրքի 92-րդ հոդվածը, համաձայն որի` դատապարտյալին թույլատրվում է… իր հաշվին վարել նամակագրություն` առանց նամակների, հեռագրերի թվի սահմանափակման:
Ըստ այդմ, նամակագրությունն իրականացվում է ուղղիչ հիմնարկի վարչակազմի միջոցով և, առանց նամակագրության բովանդակությանը ծանոթանալու, ենթակա է արտաքին զննման` արգելված առարկաների կամ նյութերի փոխանցումը բացառելու նպատակով: