Հուլիսի 26-ին՝ ժամը 20։00-ին, Գաֆեսճյան արվեստի կենտրոնում «Երաժշտության կասկադ» ծրագրի շրջանակներում «ՊԻԿ» մշակութային նախագիծը ներկայացնում է «Old band» էթնիկ խմբի համերգ-ներկայացումը։
Չնայած նրան, որ խումբը գործունեությամբ հանդես եկել ընդամենը մի քանի ամիս, արդեն իսկ առաջացրել է երաժշտասեր հասարակության հետաքրքրությունը՝ ունենալով երկու համերգային ծրագիր, ինչպես նաեւ մասնակցել մեկ տասնյակ մշակութային իրադարձությունների՝ հանդես գալով նոր մշակումներով։
Համերգ-ներկայացման բեմադրող ռեժիսոր Սամվել Թադեւոսյանը նշում է, որ այս համերգ-ներկայացումը տարբերվում է իր ձեւաչափով՝ այն ավելի մտերմիկ միջավայր է ստեղծելու՝ պայմանավորված համերգի յուրահատկությամբ եւ նոր մտահղացումներով։
Խմբի կատարողները չորսն են՝ Անուշ Հարությունյանը, Լիլիթ Հարությունյանը, Ալեքսանդր Իրադյանը, Արամ Հարությունյանը։
Վերջիններիս խոսքով հուլիսի 26-ի համերգին սպասվում են նոր, անակնկալ մշակումներ, ինչպես նաեւ արդեն իսկ սիրված կատարումներ, որոնց հանդիսատեսը ծանոթ է նախկին համերգներից։
««ՊԻԿ» նախագծի համար կարեւոր է ժամանակ առ ժամանակ հանդիսատեսին ներկայացնել երիտասարդներին, ովքեր հրաշալի տիրապետում են իրենց ներկայացրածի հիմքերին եւ ժամանակակից տենդեցներին։ Այս անգամ որոշումը կանգ է առել «Old band» էթնիկ խմբին Գաֆեսճյան արվեստի կենտրոնում «Երաժշտության կասկադ» ծրագրի շրջանակներում ներկայացնելու վրա՝ ելնելով խմբի վերոնշյալ եւ այլ որդեգրած սկբունքներից եւ ունեցած հաջողություններից»,- նշում է «ՊԻԿ» նախագծի պրոդյուսեր Անուշ Քոչարյանը։
Հիշեցնենք, որ «ՊԻԿ» մշակութային նախագիծը հուլիսի 3-ին Ալ․ Սպենդիարյանի անվ․ Օպերայի եւ Բալետի ազգային ակադեմիական թատրոնում (Ալ․ Սպենդիարյանի անվ․ Օպերայի եւ բալետի ազգային ակադեմիական թատրոնի աջակցման հիմնադրամի հետ համատեղ) ներկայացրեց կոմպոզիտոր- դիրիժոր Ալ․ Իրադյանի եւ բեմադրող- ռեժիսոր Սամվել Թադեւոսյանի «Ինքնասպանի գրառումներ» բալետային ալտերնատիվ փսիխոդրաման։ Համերգ-ներկայացումը նախագծի իրականացրած երկրորդ մշակութային իրադարձությունն է՝ Գաֆեսճյան արվեստի կենտրոնի հետ համատեղ՝ «Երաժշտության կասկադ» ծրագրի շրջանակներում։
«Old band» էթնիկ խմբի մամուլի եւ հանրության հետ կապերի կենտրոն
