Նոյեմբերի 30-ի ժամը 24-ին ավարտվել է Երևանի թիվ 1 և Շիրակի մարզի թ.35 ընտրատարածքներում դեկտեմբերի 2-ին կայանալիք Ազգային ժողովի մեծամասնական ընտրակարգով պատգամավորի լրացուցիչ ընտրություններում թեկնածուների նախընտրական քարոզչության ժամանակահատվածը: Դեկտեմբերի 1-ը «լռության» օր է:
«Փաստինֆո» լրատվական գործակալության փոխանցմամբ՝ դեկտեմբերի 2-ին ժամը 8-ից 20-ը թ.թ. 1 և 35 ընտրատարածքներում քվեարկության համար կբացվեն թվով համապատասխանաբար 35 և 45 ընտրատեղամասեր:
Թիվ 1 ընտրատարածքում պատգամավորական մանդատի համար պայքարում են երեք թեկնածուներ` «Ժառանգություն» կուսակցության կողմից առաջադրված կուսակցության վարչության գլխավոր քարտուղար, ԱԺ նախկին պատգամավոր Ստյոպա Սաֆարյանը, ՀՀԿ-ի կողմից` ՀՀ կառավարությանն առընթեր Անշարժ գույքի կադաստրի պետական կոմիտեի Երևանի տարածքային ստորաբաժանման ղեկավարի տեղակալ Ռոբերտ Սարգսյանը և ինքնաառաջադրված, Հայաստանի ժողովրդական կուսակցության անդամ Էդուարդ Պետրոսյանը:
Թիվ 35 ընտրատարածքում պատգամավորության մանդատի հավակնորդներն են ՀՀԿ-ի կողմից առաջադրված «Սովռանո» ՍՊԸ-ի տնօրեն Արման Սահակյանը և ինքնաառաջադրված «Հայոց համազգային շարժում» կուսակցության անդամ Մուրադ Գրիգորյանը:
Ընտրություններում դիտորդական առաքելություն իրականացնելու նպատակով Կենտրոնական ընտրական հանձնաժողովում գրանցվել են երեք տեղական հասարակական կազմակերպություններ: «Շահեն» ՀԿ-ն հայտավորել է 129, «Իրավակիրթ հասարակություն»-ը` 10, «Հաշմանդամների «Փարոս» կրթության և մշակույթի զարգացման կենտրոն»-ը` 4 դիտորդներ:
Ըստ ընտրությունների նախապատրաստման և անցկացման հիմնական միջոցառումների ժամանակացույցի, ԱԺ մեծամասնական ընտրակարգով պատգամավորի լրացուցիչ ընտրությունների քվեարկության նախնական արդյունքները կամփոփվեն և արձանագրությամբ կվավերացվեն մինչև դեկտեմբերի 3-ի ժամը 14-ը:
Ընտրական տեղամասում քվեարկության արդյունքների վերահաշվարկի մասին դիմումները կարող են ներկայացվել դեկտեմբերի 3-ին` ժամը 12-ից մինչև 18-ը:
Քվեարկության արդյունքները ԸԸՀ-ները կամփոփեն և ընտրությունների վերաբերյալ որոշումները կընդունեն մինչև դեկտեմբերի 7-ը:
Հիշեցնենք, որ թ.թ. 1 և 35 ընտրատարածքներում լրացուցիչ ընտրությունները նշանակվել են համապատասխանաբար ՀՀԿ անդամ Ռուբեն Հայրապետյանի և «Բարգավաճ Հայաստան» կուսակցության անդամ Սամվել Բալասանյանի պատգամավորական լիազորությունները վաղաժամկետ դադարեցված համարվելու հիմքով: Ռ. Հայրապետյանը ներկայացրել էր հրաժարականի դիմում` իր ընտանիքին պատկանող «Հարսնաքար» ռեստորանային համալիրում ծեծի ենթարկված զինվորական բժիշկ Վահե Ավետյանի մահվան պատճառով: Ս. Բալասանյանի պատգամավորական լիազորությունները դադարեցվել էին սեպտեմբերի 9-ին Գյումրիի քաղաքապետ ընտրվելու կապակցությամբ:
