ԲՀԿ-ն ՀՀԿ-ի դուստր ձեռնարկությունն է: Այսօր լրագրողների հետ հանդիպման ընթացքում նման կարծիք հայտնեց էպոսագետ, ՀՀ նախագահի թեկնածու Վարդան Սեդրակյանը՝ պատասխանելով այն հարցին, որ եթե Գագիկ Ծառուկյանն առաջադրվի, ապա կհամարի՞ իրեն լուրջ մրցակից, թե՞ ոչ:
«Ես ինձ մրցակիցներ չեմ տեսնում, ես չեմ եկել որևէ մեկի հետ մրցակցելու: Նախ մարդը, որի անունն այստեղ հնչեց, ՀՀ նախագահ չի եղել: Մի անգամ արդեն ասել եմ, որ ԲՀԿ-ն ՀՀԿ-ի դուստր ձեռնարկությունն է, և Գագիկ Ծառուկյանը երբեք նույնիսկ իրավունք էլ չի ունենա միայնակ որոշում կայացնել: Այս ամենն ավարտվելու է նրանով, որ Գ. Ծառուկյանը կհայտարարի Սերժ Սարգսյանին սատարելու մասին:
Կան տասնյակ կուսակցություններ և հարյուրավոր թեկնածուներ: Ես իմ քարոզարշավի հենց սկզբից ասել եմ, որ Հայաստանի այսօրվա վիճակի համար 3 մարդ է պատասխանատու: Բայց ես չեմ գալիս նրանց կործանելու կամ սնանկացնելու: Միայն եթե երեքով՝ Սերժիկ Սարգսյանը, Ռոբերտ Քոչարյանը և Լևոն Տեր-Պետրոսյանը համախմբվեն իմ շուրջը, մենք կունենանք հաղթանակ և հաջողություններ»:
Խոսելով Րաֆֆի Հովհաննիսյանի կողմից իր առաջարկը մերժելու և «Ժառանգություն» խմբակցության մամլո խոսնակ Հովսեփ Խուրշուդյանի այն հայտարարության մասին, թե Վարդան Սեդրակյանի առաջարկը կոռեկտ չէ, էպոսագետն ասաց. «Ես ասել էի, որ այդ գումարը նրան մի պայմանով եմ տալիս՝ եթե ինքն անցնի 5 տոկոսը, որը քիչ հավանական է, գումարը պետք է վերադարձներ ինձ: Իսկ եթե չէր հաղթահարում, և դա այդպես էլ կլիներ, գումարը մնում է պետությանը: Այդ կուսակցությունը հայտարարում է, որ ընտրագրավի գումար ունի, իսկ քարոզարշավի՝ ոչ: Իսկ քարոզարշավի ընթացքում կարելի է անել մի գործողություն, որը գործող նախագահի մեկնաբանությամբ կոչվում է «ատկատ»: Այնպես որ, կոռեկտության մասին խոսելուց, թող առաջին հերթին իրենք մտածեն` որքանո՞վ է կոռեկտ, որ ՀՀ նախագահի թեկնածուն՝ Հայաստանի քաղաքական գործիչը 3 ամսվա մեջ 3-4 անգամ հանդիպում է ԱՄՆ դեսպանի հետ: Եվ այն, որ հայտարարում է` գումար է պետք իրեն առաջադրվելու համար»:
