«ՍԱՍ-ԳՐՈՒՊ» ընկերությունը ֆինանսական շուկայում նոր առաջարկ է ներկայացնում՝ արտարժույթով պարտատոմսերի թողարկում, որը հնարավորություն է ընձեռում շահավետ պայմաններով ներդրում կատարել անվանական արժեկտրոնային պարտատոմսերում: Այս մասին այսօր լրագրողների հետ հանդիպմանը հայտնեց ընկերության սուպերմարկետների ցանցի տնօրեն Ստեփան Սահակյանը: Ըստ նրա ՝ առաջարկվող պարտատոմսերի անվանական եկամտաբերությունը կկազմի տարեկան 10.1%, որը կվճարվի տարին երկու անգամ:
Պարտատոմսերի տեղաբաշխումն իրականացնելու է «Ամերիաբանկ» ՓԲԸ-ն՝ այս տարվա դեկտեմբերի 6-ի ժամը 10:00-ից մինչև 2013թ. հունվարի 10-ի ժամը 16:00-ն ընկած ժամանակահատվածում:
«Սա կապիտալի շուկայում ներդրողներին ներկայանալու առաջին քայլն է, հասկանալու՝ արդյոք ի՞նչ հետաքրքրություն ունեն ներդրողները կոնկրետ թողարկողի նկատմամբ: Դինամիկ զարգացման հեռանկարում «ՍԱՍ-ԳՐՈՒՊ»-ը պատրաստվում է նաև IPO-ի»,- ասաց «Ամերիաբանկ» ՓԲԸ-ի ներդրումային բանկային գործառնությունների գծով տնօրեն Առնո Մոսիկյանը:
Նա հայտնեց, որ ապագայում պատրաստվում են կատարել բաժնետոմսերի թե մասնավոր, թե հանրային տեղաբաշխում:
Մեկ պարտատոմսի անվանական արժեքը կազմում է 10 դոլար, ինչը հանրությանը կընձեռի առավել լայն ընդգրկվածություն ունենալ պարտատոմսերի ձեռք բերման գործընթացում: Նախատեսվում է տեղաբաշխել թվով 700 հզ. պարտատոմս՝ 7 մլն դոլար ծավալով, որի շրջանառության ժամկետը կազմում է 24 ամիս: Արժեկտրոնները վճարվելու են 6 ամիս պարբերականությամբ՝ պարտատոմսի անվանական արժեքի 5.05%-ի չափով:
