Միչիգանի կոնգրեսի սենատոր Ռիկ Ջոնսն առաջարկել է Դեթրոյթ քաղաքի աղետալի ֆինանսական վիճակի պատճառով կազմացրել քաղաքը։ Այս մասին հայտնում է CBS Local-ը: Ջոնսի կարծիքով` քաղաքը կարելի կլինի բաժանել Ուեյն շրջանի ուրիշ բնակավայրերի միջև այն դեպքում, եթե այն սնանկ հայտարարվի:
Ջոնսը նաև նկատել է, որ Դեթրոյթի կազմացրումը քաղաքի խնդիրների լուծման ուղիներից մեկն է և այն պետք չէ բացառել: Միչիգանի նահանգապետ Ռիկ Սնայդերը ևս հայտարարել է, որ Դեթրոյթը սնանկ հայտարարելու և կազմացրելու հնարավորությունը լիովին բացառել չի կարելի: Միևնույն ժամանակ այս հնարավորությունն առայժմ լրջորեն չի քննարկվում:
Դեթրոյթը մի քանի տարի է` ֆինանսական ճգնաժամ է ապրում, սակայն 2012-ի վերջին իրավիճակն այնքան է սրվել, որ արդեն դեկտեմբերի կեսին քաղաքը կարող է առանց դրամի մնալ: Մինչև տարեվերջ քաղաքը ծրագրում է պարտատոմսերի թողարկման հաշվին 30 մլն դոլար ձեռք բերել, սակայն նահանգը պատրաստ է այդ միջոցները հատկացնել որոշակի պայմանների ապահովման դեպքում, ինչը Դեթրոյթն առայժմ չի կարող անել։
The Detroit News-ը ճշգրտում է, որ մասնավորապես` նահանգը պահանջում է, որպեսզի Դեթրոյթը եռամյա պայմանագիր կնքի Miller Canfield իրավաբանական ընկերության հետ, որը քաղաքի համար տիրող ծանր իրավիճակում իրավաբանական խորհրդատվություն կկազմակերպի: Քաղաքային խորհուրդը պետք է այս պայմանագիրը հաստատեր դեռ անցյալ շաբաթ, սակայն գործընթացը ձգձգվել է, ինչի հետևանքով քաղաքը նախատեսված ժամկետում նահանգից չի ստացել 10 մլն դոլարի տրանշը:
Եթե քաղաքային խորհուրդը մոտ ժամանակներս չպայմանավորվի պայմանագրի ընդունման հարցում, դեկտեմբերի կեսին բյուջեի փողերը կվերջանան և մունիցիպալ աշխատողները 2013-ի հունվարի 1-ից կուղարկվեն չվճարվող արձակուրդի: Տեղացի պաշտոնյաները, սակայն ասում են,որ կարճաժամկետ խնդիրներն ամենահրատապը չեն. Իրավիճակը բարելավելու համար անհրաժեշտ է ֆինանսների և քաղաքային կառավարման գլոբալ վերակառուցում:
2012-ի ապրիլին հայտնում էին, որ Դեթրոյթի պարտքերը երկարաժամկետ պարտատոմսերով կազմում են 12 մլրդ դոլար:
