Գրողների միությունում բացվել է «Նվիրաբերում» ցուցահանդեսը, որտեղ ներկայացված են տարբեր ոճի նկարներ՝ ռեալիստականից մինչև վերացական, որոնք արտացոլում են այսօրվա և վաղվա պատկերը:
«Աշխարհի հայ նկարիչների միության» նախագահ Ղազար Միրզոյանը նկատեց, որ հավաքվել են այնպիսի նկարներ, որոնք կարող են գումար բերել, ցուցահանդեսի անունն էլ պատահական չի ընտրվել՝ հասույթը նվիրելու են իրենց բանաստեղծ ընկերոջը՝ Խաչիկ Մանուկյանին, որն այսօր բանկային գործարքի հետ կապված լուրջ խնդիրներ ունի, որոնց մեջ հայտնվել է մեծամասամբ ոչ իր մեղքով:
Ցուցահանդեսի կայացմանը հիմնականում աջակցել են Վաղարշապատ քաղաքի նկարիչները, նվիրաբերվել են նաև աշխարհահռչակ ստեղծագործողների գործերից, որոնց թվում է Մինաս Ավետիսյանի գրաֆիկան:
«Առաջին լրատվականը» նաև զրուցեց բանաստեղծ Խաչիկ Մանուկյանի հետ, որին օգնելու համար էլ կազմակերպվել էր ցուցահանդեսը: Վերջինս չցանկացավ փակագծերը բացել, միայն նկատեց, որ կյանքի ճանապարհը հարթ չէ, քայլելիս մեկ վայր ես ընկնում, մեկ բարձրանում։ «Բանկային գործառույթների հետ առնչվող խնդիրներ են եղել, առանց վարկ ստանալու դարձել եմ դրա կրողը, վարկ վերցնողը մահացել է, և այն մնացել իմ ուսերին»,- ասաց բանաստեղծը՝ հավելով, որ այդ խնդիրների շուրջ շատ խոսել չի ցանականում, ցուցահադեսը պետք է վայելել։
«Ես ուզում եմ էս խինդը կիսել, էս պայծառությունը, թող բանկային գործարքները մնան մի կողմ։ Ես ասել եմ, որ այսօր ամեն ինչ նյութականցվել է, շատերի համար հայրենիքը, հերը, մերը կոչվում է փող։ Թքել եմ էդ բոլոր արժեքների վրա, որոնք չափվում են թղթերով ու մետաղներով»,- ասաց բանաստեղծը՝ հավելելով, որ իր համար կարևորը մարդն է, պոեզիան:
Առավել մանրամասն՝ տեսանյութում։
