Թուրքական Hürriyet թերթի փոխանցմամբ՝ ամերիկյան The Wall Street Journal (WSJ) պարբերականը հայտնել է, որ Գերմանիան ճնշում է գործադրում Թուրքիայի վրա, որպեսզի վերջինս կրճատի պահանջները՝ կապված Սիրիայի հետ իր սահմանին Patriot զենիթա-հրթիռային համալիրների տեղակայման հետ:
Այս մասին WSJ-ին հայտնել է բանակցային գործընթացին մոտ կանգնած աղբյուրը: Վերջինիս հաղորդմամբ՝ Թուրքիան խնդրում է օգնել իրեն թուրք-սիրիական 910 կիլոմետրանոց սահմանից մոտ 80 կիլոմետր շառավղով գտնվող բոլոր քաղաքների ու գյուղերի պաշտպանության հարցում: Սակայն Գերմանիան ցանկանում է նվազագույնի հասցնել թուրքական պահանջները:
Գերմանական հասարակությունը դեմ է Թուրքիայի տարածքում Patriot համակարգերի տեղակայմանը: Նախորդ շաբաթ Գերմանիայում հրապարակվել էին այդ կապակցությամբ անցկացված հարցախույզի արդյունքները, որոնք վկայել են, որ գերմանացիների 59 տոկոսը դեմ է Թուրքիայում Patriot համակարգերի տեղակայմանը: Գերմանական ընդդիմադիր կուսակցությունները նույնպես դեմ են Patriot-ների տեղակայմանը Թուրքիայում:
