Ռեյնլանդ-Պֆալցի դաշնային հողերի գերագույն դատարանն արդարացրել է Նոյվիդ քաղաքի դպրոցի մաթեմատիկայի, անգլերենի և կրոնի 32-ամյա ուսուցիչին, ով մեղադրվում էր մանկապղծության մեջ: Օրենքը ուսուցչի կողմն է եղել, քանի որ տուժողը նրա հիմնական և պաշտոնական աշակերտուհին չի եղել:
Ինչպես հետևում է սկանդալային գործի նյութերից, ուսուցիչն ինտիմ կապի մեջ է մտել 14-ամյա Լենայի հետ: Աղջկան նա հանդիպել է դպրոցի միջանցքներում, սակայն այն դասարանում, որտեղ Լենան էր սովորում, այդ ուսուցիչը շատ քիչ է եղել: Սկզբում շփումը համացանցով է տեղի ունեցել, հետո ուսուցիչն աղջկան սեռական հարաբերություն է առաջարկել։ Նրանց կապը հինգ ամիս է տևել և դադարել է այն ժամանակ, երբ աղջկա ծնողներն իմացել են այդ մասին:
Լենայի ծնողների դատախազություն դիմելուց հետո քրեական գործ է հարուցվել, որը տեղափոխվել է տարածքային դատարան: «Մեղադրականը սեքսուալ կոնտակտի 22 էպիզոդ է ներառում»,– գրում է Die Welt-ը: Դրանցից մի քանիսը տեղի են ունեցել դպրոցի հավաքարարի սենյակում: Դատարանը մեղադրյալին մեղավոր է ճանաչել և դատապարտել է երկու տարվա ազատազրկման: Բացի դրանից, մեղադրյալը զրկվել է պետական ծառայողի իրավունքից և դրանից բխող առավելություններից:
Սակայն նույնիսկ այսպիսի թեթև պատիժը դուր չի եկել մանկապիղծին, և նա որոշել է բողոքարկել այն: Ուսուցիչը Ռեյնլանդ-Պֆալցի գերագույն դատարան է դիմել, որը ի զարմանս Լենայի ծնողների և դպրոցի աշխատակիցների՝ արդարացրել է նրան:
Գերմանիայի ՔՕ 174 հոդվածի համաձայն՝ 14 տարեկանից բարձր անչափահասների հետ սեռական հարաբերությունները հանցագործություն չեն համարվում: Սակայն եթե տուժողը կախված է լինում բռնարարք ցուցաբերողից, ապա նրանց միջև սեռական հարաբերությունները թույլատրվում են 16 տարեկանից սկսած:
Այս դեպքում մի քանի փոխարինումներից բացի, ուսուցիչն այդ աշակերտուհու դասարանում չի դասավանդել: Այդ հիմքով մանկապիղծին արդարացրել են: Այդ որոշումը դժգոհությունների առիթ է հանդիսացել: Սակայն միայն մեկ տարի անց որոշում է կայացվել վերանայել հանցագործին արդարացնող օրենքը:
Փորձագետներն առաջարկել են քրեական պատասխանատվության ենթարկել անչափահասների հետ սեռական հարաբերություն ունեցած՝ կրթության ոլորտում աշխատող բոլոր անձանց:
