Ադրբեջանն օգտագործում է քաղաքական և տնտեսական գործոններ Ղարաբաղյան հակամարտության խաղաղ լուծման համար։ Այդ մասին հայտարարել է Ադրբեջանի նախագահ Իլհամ Ալիևը՝ ելույթ ունենալով երկրի դիվանագիտական ծառայության մարմինների ղեկավարների խորհրդակցությունում, հաղորդում է ITAR-TASS–ը։
Ադրբեջանի առաջնորդն ընդգծել է, որ իր երկիրը, ավելացնելով իր ներուժը, ի զորու է կարգավորել խնդիրը ռազմական ճանապարհով։
«Սակայն մենք համարում ենք, որ բանակցությունների ներուժը դեռ չի սպառվել։ Օգտագործելով քաղաքական, տնտեսական ու ռազմական ճնշումը՝ մենք ձգտելու ենք նրան, որ հարցը լուծվի խաղաղ ճանապարհով։ Մեր տնտեսական, քաղաքական և ռազմական պոտենցիալը բավական հզոր է, և այդ գործոնը դրական դեր կխաղա բանակցություններում»,- ասել է Ալիևը։ Նա ընդգծել է, որ հակամարտությունը չի կարող սառեցված մնալ։
Ադրբեջանի նախագահը նշել է, որ չնայած միջազգային միջնորդների ջանքերին, որևէ արդյունք ձեռք չի բերվել հակամարտության լուծման մեջ։
«Մենք այնպիսի տպավորություն ունենք, որ այդ հարցով (ղարաբաղյան) զբաղվող միջնորդները շահագրգռված են ավելի շատ նրանով, որ պահպանվի իրավաճակը ներկա տեսքով։ Նրանց հիմնական հետաքրքրությունն այն է, որ տարածաշրջանում չխախտվի կայունությունը, չլինի պատերազմ։ Մենք նույնպես խաղաղություն ենք ուզում։ Բայց միաժամանակ մենք ուզում ենք մեր հողերը, ուզում ենք ճշմարտության և արդարության վերականգնում, միջազգային իրավունքի հաղթանակ»,- ընդգծել է նա։
Ալիևը նաև համարում է, որ հակամարտությունը պետք է լուծվի «արմատականորեն»։ «Հարցի կիսատ լուծումը կարող լինել միայն փուլ։ Մենք չպետք է մոռանանք գլխավոր նպատակի մասին։ Ադրբեջանցիները պետք է վերադառնան օկուպացված տարածքներ»,- ասել է Ալիևը։ Նա ընդգծել է, որ Լեռնայի Ղարաբաղի հայերը կարող են ստանալ ինքնավարության բարձր կարգավիճակ ադրբեջանական պետության շրջանակներում։ «Մենք առաջարկել ենք դա, և նման մոտեցումը հիմնված է աշխարհում և Եվրոպայում առկա ամենադրական փորձի վրա»,- հավելել է նա։