Հայաստանի Հանրապետության վարչապետ Տիգրան Սարգսյանը Interfax-ին տված հարցազրույցում անդրադարձել է Վրաստանի հետ հարաբերություններին, մասնավորապես` վրաց-աբխազական երկաթուղային ճանապարհի վերագործարկման հարցին:
Տ. Սարգսյանի խոսքով՝ երկաթուղային ճանապարհի վրաց-աբխազական հատվածի բացումը խիստ կարևոր է, ինչը նշանակում է Վրաստանի միջոցով երկաթուղային հաղորդակցությամբ բեռնափոխադրումներ իրականացնել Ռուսաստան ու հակառակ ուղղությամբ: Դա զգալիորեն կբարելավի տրանսպորտային լոգիստիկան և կնվազեցնի ծախսերը ներկրողների ու արտահանողների համար:
«Ոչ ոքի համար գաղտնիք չէ, որ Հայաստանի համար, որի սահմանների մեծ մասը փակ է Ադրբեջանի ու Թուրքիայի կողմից, յուրաքանչյուր նոր տրանսպորտա-լոգիստիկա-փոխանցումային միջանցք հավելյալ պայմաններ է ստեղծում արտադրության զարգացման ու ընդլայնման, առևտրի, զբոսաշրջության համար: Այնպես որ` այս հարցում ոչ մի կասկած չի կարող լինել: Ինչ վերաբերում է տեխնիկական հարցերին, ապա չեմ կարծում, թե դա հիմնական խնդիրն է՝ կապված երկաթուղային ճանապարհի գործարկման հետ, քանի որ կան ընկերություններ, որոնք պատասխանատու են երկաթուղային ճանապարհի շահագործման համար»,- ասել է նա:
Հարցին՝ արդյոք Հայաստանը չի՞ ծրագրում ինչ-որ այլ կարգի մասնակցություն, օրինակ՝ միջնորդական, ՀՀ վարչապետը պատասխանել է, թե այդ հարցը դեռ չի քննարկվել, քանի որ այսօրվա դրությամբ օրակարգում նման միջնորդական կամ լոբբիստական միջոցառում նախատեսված չէ: Նրա խոսքով` ժամանակ է անհրաժեշտ` հասկանալու համար, թե ինչպես պետք է կարգավորվեն երկկողմ հարաբերությունները: «Այստեղ պետք է աշխատել չվնասելու սկզբունքով»,- ասել է վարչապետը:
Interfax-ի այն հարցին՝ արդյոք սկսվե՞լ է Երևանից Բաթում ավտոճանապարհի կառուցումը, և ի՞նչ քաղաքական կամ տնտեսական դիվիդենդներ կստանա Հայաստանն այդ նախագծից, Տիգրան Սարգսյանը պատասխանել է` դա լինելու է Հյուսիս-Հարավ ավտոմոբիլային ճանապարհ, որը Հայաստանը սկսել է իրականացնել Ասիական զարգացման բանկի հետ համատեղ՝ ստորագրելով 500 մլն դոլարի վարկային ռեսուրսների ներգրավման մասին համաձայնագիր: Նրա խոսքով` նման ծրագիր գոյություն ունի նաև Վրաստանի տարածքում՝ դարձյալ ՎԶԵԲ-ի հետ համատեղ:
«Այդ արագընթաց ճանապարհները կմիավորվեն: Մենք դրանում շահագրգռված ենք, քանի որ Հայաստանի տարածքում մինչ օրս չկային ժամանակակից արագընթաց ճանապարհներ, որոնք կհամապատասխանեին միջազգային չափանիշներին: Դրանք, իհարկե, շատ թանկ ճանապարհներ են, սակայն հասկանալի է, որ այդ թանկ լինելը պայմանավորված է այն տեխնիկական պայմաններով ու չափանիշներով, որոնք մենք այսօր ներդնում ենք: Հյուսիս-Հարավ ավտոմայրուղու շինարարության ընդհանուր արժեքը գնահատվում է 1,5 մլրդ դոլար»,- նշել է Տիգրան Սարգսյանը:
Նա հավելել է նաև, որ Ասիական զարգացման բանկը աշխատանքը համակարգում է նաև այլ վարկատուների հետ, որոնք հետագայում պետք է մասնակցեն նախագծի ֆինանսավորմանը:
