Իսրայելի պաշտպանության նախարար Էհուդ Բարաքը հայտարարել է, որ հեռանում է մեծ քաղաքականությունից և չի մասնակցի հունվարին կայանալիք ընտրություններին, սակայն մինչ այդ կկատարի իր պարտականությունները ռազմական գերատեսչության ղեկավարի պաշտոնում,- հաղորդում է RIA Novosti-ն:
Էհուդ Բարաքը նշել է, որ հեռանում է քաղաքական կյանքից և չի մասնակցի գալիք ընտրություններին:
«Ես կլքեմ պաշտպանության նախարարի պաշտոնը, հենց որ ձևավորվի նոր կառավարություն, այսինքն՝ մոտավորապես երեք ամսից»,- հայտարարել է Բարաքը Թել Ավիվիում տեղի ունեցած մամլո ասուլիսի ժամանակ:
Նախարարի խոսքերով՝ պաշտոնից հեռանալուց հետո ինքը պատրաստվում է շատ ժամանակ անցկացնել ընտանիքի հետ, զբաղվել ստեղծագործական գործունեությամբ և «վայելել կյանքը»:
«Ես պատրաստ եմ խորհուրդ տալ վարչապետին անվտանգության ոլորտի ցանկացած խնդրի շուրջ, եթե իմ կարծիքը կցանկանան լսել և կարևոր կհամարեն»,- ասել է Էհուդ Բարաքը:
Նա խոստովանել է, որ վաղուց էր մտածում հրաժարական տալու մասին, սակայն վերջնական որոշումը ընդունելը ստիպված է եղել հետաձգել Գազայի հատվածում ռազմական գործողության պատճառով, որն ավարտվեց անցած շաբաթ:
