Грузия Online-ի փոխանցմամբ՝ ԵՄ-ի դիվանագիտության ղեկավար Քեթրին Էշթոնն այսօր Թբիլիսի ժամանելուց առաջ լրագրողների հետ զրույցում մեկնաբանել է իր առաջիկա վրացական այցը. «ԵՄ-ը մեծ նշանակություն է տալիս Վրաստանի նախագահի և նոր կառավարության միջև կառուցողական համագործակցությանը: Մեծ անհամբերությամբ եմ սպասում Վրաստանի նախագահի և վարչապետի հետ իմ հանդիպումներին:
Մենք պետք է շատ բան քննարկենք, այդ թվում՝ նաև երկրում ընթացող ներկայիս զարգացումները, ասոցացման և ազատ առևտրի համաձայնագրերի հարցը: Ցանկանում եմ նաև ընդգծել, որ Վրաստանի ու ԵՄ-ի համար ընդհանուր են օրենքի գերակայության ու արդարադատության անկողմնակալ օգտագործման արժեքները»:
Հիշեցնենք, որ Կենտրոնական Ասիա ուղևորվող Քեթրին Էշթոնն այսօր մի քանի ժամով ժամանելու է Թբիլիսի, ուր հանդիպելու է Վրաստանի նախագահի, վարչապետի և արտգործնախարարի հետ, որից հետո տալու է մամուլի ասուլիս:
