Վառարանները հատկապես վտանգավոր են թոքերի հետ կապված տարբեր խնդիրներ ունեցող մարդկանց համար: Սա վերաբերում է և՛ գազով, և՛ փայտով վառվող վառարաններին: Այս մասին «Առաջին լրատվական»-ի հետ զրույցում ասաց բժշկուհի Տաթևիկ Արշակյանը.
«Վառարանը թթվածին է կլանում: Իսկ այն մարդիկ, ովքեր թոքերի և հետևաբար նաև շնչառական ուղիների հետ կապված խնդիր ունեն, պետք է աշխատեն գոնե վառարանին մոտ չնստել: Իսկ ընդհանրապես եթե մարդը նշված բնագավառում լուրջ առողջական խնդիր ունի, և բնակարանն էլ, վառարանից բացի, ուրիշ ոչնչով տաքացնել հնարավոր չէ, ապա պետք է գոնե տանը տարբեր տեսակի բույսեր լինեն՝ և ինչքան շատ, այնքան լավ:
Գազի գնի թանկացման պատճառով, իսկ շատ գյուղերում նաև միջոցների պակասի պատճառով այժմ վառում են հին՝ փայտով վառվող վառարաններ: Պետք է նշեմ, որ թե՛ առողջության, և թե՛ անվտանգության տեսակետից սրանք ավելի նախընտրելի են: Գազով վառարանների դեպքում սխալ վերահսկելու, անվտանգության միջոցներին մատների արանքով նայելու դեպքում կարող է լինել շմոլ գազի արտահոսք, ինչն էլ կառաջացնի մարդու օրգանիզմում թունավորում՝ ծանր ինտոքսիկացիա: Եթե դեպքը տեղի ունենա այն ժամանակ, երբ մարդը քնած է, ապա հնարավոր է, որ նա նույնիսկ չփրկվի»:
