ԲՀԿ նախագահ Գագիկ Ծառուկյանի որոշման էությունը բոլորովին կապ չունի թեկնածու առաջադրվելու հետ: Դա լինելու է նրա, այսպես ասած, որոշման արտաքին շղարշը, ձևը, ֆորման: Բովանդակության առումով նրա որոշումը կամ ընտրությունը կապված է Սերժ Սարգսյանի և Ռոբերտ Քոչարյանի հետ:
Ծառուկյանը պետք է ընտրի, թե նախագահական ընտրություններում որ կողմից է խաղալու` Սերժ Սարգսյանի՞, թե՞ Ռոբերտ Քոչարյանի: Այդ խաղի մեջ նա կարող է լինել թեկնածու կամ սատարող, կամ, ասենք, ունենալ որևէ այլ կարգավիճակ: Սրանք արդեն երկրորդական են, իսկ բուն խնդիրը ընտրությունն է Սերժ Սարգսյանի և Ռոբերտ Քոչարյանի միջև:
Գագիկ Ծառուկյանը երևի լավ է հասկանում, որ որևէ այլ ընտրություն նրան չի ներվելու` ոչ Ռոբերտ Քոչարյանի, ոչ Սարգսյանի կողմից: Այսինքն` եթե նա հանկարծ երրորդ տարբերակ ընտրի, ապա մնալու է անպաշտպան, եթե, իհարկե, նրան չպաշտպանեն Ռուսաստանը կամ Ամերիկան, թեև ամենևին երաշխիք չկա, որ ԱՄՆ-ին ու Ռուսաստանին գործնականում հետաքրքրում է Ծառուկյանի ճակատագիրը:
Ընտրելով երրորդ տարբերակ` Ծառուկյանը կարող է խախտել Հայաստանի ներքաղաքական հավասարակշռությունը: Այսօր նա հանդիսանում է կողմերից մեկը, բայց հիմնականում Ռոբերտ Քոչարյանի շնորհիվ: Եթե Քոչարյանի պարագան չլիներ, Ծառուկյանը վաղուց չէր լինի ներքաղաքական կամ ավելի շուտ` ներիշխանական կողմ:
ԲՀԿ նախագահը կարող է ձերբազատվել Քոչարյանից, բայց միայն Սերժ Սարգսյանի միջոցով, նրա օգնությամբ, ինչը նշանակում է ընտրել Սերժ Սարգսյանին: Սերժ Սարգսյանից ձերբազատվել Ծառուկյանը կարող է միայն Ռոբերտ Քոչարյանի օգնությամբ: Ինչն էլ նշանակելու է արդեն լիովին տրվել Ռոբերտ Քոչարյանին:
Լևոն Տեր-Պետրոսյանն այստեղ ընդամենը գործիք է, որով Ծառուկյանը կարողանում է փոքր-ինչ մանևրել: Սակայն այդ գործիքը նրա համար կիրառելի է որոշակի ժամանակահատվածում` մինչև որ կգա նախագահական ընտրություններում թեկնածուների առաջադրման պաշտոնական ժամկետը: Դրանից հետո Լևոն Տեր-Պետրոսյանն այլևս չի կարող Ծառուկյանին ոչնչով օգնել, իսկ եթե նա հանկարծ ընտրի Տեր-Պետրոսյանին, ապա կամ նրա հետ միասին Քոչարյանին է ծառայելու, կամ ծառայելու է Սերժ Սարգսյանին, որովհետև ՀԱԿ-ն այսօր ինքնուրույնության ռեսուրս չունի, որ կարողանա արդյունավետ կերպով պաշտպանել Ծառուկյանին Քոչարյանից ու Սարգսյանից:
ԲՀԿ նախագահի համար ամենալավ տարբերակը կլիներ այն, որ ներքին զարգացումները դասավորեր Մոսկվան: Սակայն ակնհայտ է, որ Մոսկվան ամեն ինչ թողել է ինքնահոսի և ընդամենը ընդհանուր վիճակն է փորձում վերահսկել, որպեսզի թույլ չտա էական շեղումներ առանցքից: Պուտինի բոյկոտը` որ նա համառորեն չի այցելում Հայաստան, ոչ միայն Սերժ Սարգսյանի, այլև ընդհանրապես հայաստանյան քաղաքական դաշտի, այսինքն` այդ թվում նաև Ծառուկյանի ու Քոչարյանի դեմ է:
Պատահական չէ, որ այս ընթացքում Քոչարյանը ոչ մի անգամ տեղեկություն չտարածեց, որ հանդիպել է Պուտինին: Այսինքն` Մոսկվայից ցուցումներ չկան, ինչը նշանակում է, որ որոշակի սահմաններում ներքին ազատություն է տրվել: Իսկ այդ ազատությունը տնօրինել ներսում երբեք չեն իմացել, այդ թվում նաև` Ծառուկյանը: Նրանք սովոր են ցուցումներին, և երբ դրսից ցուցումներ չեն լինում, ներսում ամեն ինչ խառնվում է իրար, և խուճապ ու անորոշություն է առաջանում:
