Ռուսաստանի նախագահ Դմիտրի Մեդվեդևը ՄԱԿ-ի Անվտագության խորհրդում Լիբիայի հարցով 1973 բանաձևը քննարկելիս ցանկացել է աջակցել դրան: Հիշեցնենք, որ բանաձևով սահմանվել է, որ Լիբիայի օդային տարածքը պետք է փակվի, որպեսզի Քադաֆիի ռազմաօդային ուժերը չռմբակոծեն ընդդիմության վերահսկողության տակ գտնվող բնակավայրերը: Այս մասին այսօր գրել է Коммерсант-ը:
Թերթը նաև տեղեկացնում է, որ սրան հակառակ՝ արտաքին գործերի նախարարությունը մտադիր է եղել վետո դնել բանաձևի վրա` կանխելով օտարերկրյա ռազմական միջամտությունը Լիբիայի ներքին գործերին: Ի վերջո, «նախագահականն» ու արտաքին գործերի նախարարությունը եկել են փոխզիջման, իսկ Ռուսաստանը ՄԱԿ-ի Անվտանգության խորհրդում ձեռնպահ է մնացել` չաջակցելով բանաձևին: ՌԴ նախագահի մամուլի խոսնակ Նատալյա Տիմակովան թերթին ասել է, որ Կրեմլը երբեք հակասություններ չի ունեցել արտաքին գործերի նախարարության հետ և միշտ հետևողական է եղել Լիբիայի հարցում:
Հիշեցնենք, որ մի քանի օր առաջ նախագահ Դմիտրի Մեդվեդևը հրամանագիր էր ստորագրել, որով արգելափակվել էին Լիբիայի առաջնորդ Մուամար Քադաֆիի, նրա ընտանիքի անդամների և որոշ պաշտոնատար անձանց հաշվեհամարները, իսկ Քադաֆիին արգելվել էր մուտք գործել Ռուսաստանի տարածք: Այդուհանդերձ, Լիբիայի առաջնորդը, բացասական գնահատելով Արևմուտքի դիրքորոշումը Լիբիայի ներքաղաքական զարգացումների հարցում, բարձր էր գնահատել Ռուսաստանի, Բրազիլիայի և Հնդկաստանի դիրքորոշումը, և խոստացել նավթարդյունաբերական ոլորտ թողնել այս երկրների նավթային ընկերություններին` դուրս թողնելով ավանդաբար այստեղ աշխատող արևմտյան նավթագազային ընկերություններին:
