1in.am-ը տեղեկացրել էր, որ Եգիպտոսում Թահրիր հրապարակում զանգվածային ցույցեր են սկսվել երկրի սահմանադրության մեջ փոփոխություններ մտցնելու դեմ, որոնք անսահմանափակ իշխանություն են տալիս երկրի նախագահ Մուհամմադ Մուրսիին և նրան դատական իշխանության լիազորություն ապահովում:
Շաբաթ օրը առավոտյան բախումները նոր թափ ստացան. ցուցարարները քարեր էին շպրտում անվտանգության ծառայողների վրա, որոնք իրենց հերթին արցունքաբեր գազով ականներ էին շպրտում: Ամենամեծ ցույցի ժամանակ, որն անցկացվել է Կահիրեում Թահրիր հրապարակում, որոշում է կայացվել մեկ շաբաթ նստացույց անցկացնել սահմանադրական փոփոխությունների դեմ:
Ցուցարարների շարքերում է ՄԱԳԱՏԷ-ի նախկին ղեկավար Մուհամմադ էլ-Բարադեյը, ով փորձում էր պայքարել նախագահական աթոռի համար: Էլ-Բարադեյը, ով մասնակցել էր նաև 2011 թվականի ցույցերին, հայտարարել է, որ «Մուրսին իրեն եգիպտական նոր փարավոն է հռչակել»:
Հիշեցնենք, որ Մուրսին հաստատել է սահմանադրական այն փոփոխությունները, որոնք նախատեսում են երկրի ղեկավարի անսահմանափակ լիազորություններ:
Մուհամմադ Մուրսին, փորձելով հանգստացնել կրքերը, հայտարարել է, որ իր այդ որոշումը պայմանավորված է երկրում սոցիալական և տնտեսական կայունության ամրապնդմամբ: Նրա խոսքերով` հրամանագիրը կարագացնի Եգիպտոսի անցումը ժողովրդավարության, որը ձգձգվում էր տարբեր իրավաբանական խոչընդոտների պատճառով: Մուրսին ասել է, որ ընդդիմությունը իրեն «չի անհանգստացնում», սակայն այն պետք է «իսկական և ուժեղ լինի», այլ ոչ թե «անցած ռեժիմի հաշվին գործող ընդդիմություն»:
