Եթե հիշում եք, 2008 թվականի աշնանը կառավարությունը նախկին վարչապետ Տիգրան Սարգսյանի գլխավորությամբ ընդունեց «Ջերմուկ քաղաքը զբոսաշրջային կենտրոն դարձնելու» մասին որոշում, ըստ որի Ջերմուկը պետք է դառնա զբոսաշրջային, առողջարանային, շախմատի առաջնությունների կենտրոն: Այս կոնտեքստում անգամ ընդունվեց Ջերմուկի «Մոծակների դեմ պայքարի ծրագիրը», որը, սակայն, Վերահսկիչ պալատի գնահատմամբ, իրականցվել էր խայտառակ բացթողումներով:
Օրերս Lragir.am-ը հրապարակեց Ջերմուկ քաղաքի «Սոցիալ-տնտեսական զարգացման աջակցություն» հիմնադրամի 2011 թվականի հաշվետվությունը, որտեղ ուշագրավ տեղեկություններ արձանագրվեցին: Ըստ այդմ՝ «Հայաստանի էլեկտրական ցանցեր» ՓԲԸ-ն, որն այսօր ֆինանսական ճեղքվածքի պատճառով բարձրացնում է էլեկտրաէներգիայի սակագինը, Ջերմուկի զարգացման հիմնադրամին 300 մլն դրամ գումար է նվիրել, «Երևան գարեջուր» ՓԲԸ-ն՝ 385 հազար դրամ, «Ամիրտամ Ա» ՍՊԸ-ն՝ 1 մլն դրամ, «Արշավիր և Պայծառ Աբրահամյաններ» ԲՀ-ն` 500 հազար դրամ, անհատ բարերարները` 1 մլն 800 հազար դրամ:
Ուշագրավ է, որ «Սոցիալ-տնտեսական զարգացման աջակցություն» հիմնադրամը ղեկավարում է Ջերմուկի քաղաքապետ Վարդան Հովհաննիսյանի որդին՝ Գևորգ Հովհաննիսյանը: Ընդ որում՝ հիմնադրամը ֆինանսավորել է Ջերմուկի քաղաքապետի գործուղման ծախսերը՝ 1մլն 535 հազար 400 դրամ:
«Ես ավելի շատ եմ շրջագայում տարվա կտրվածքով: Դա ուղղակի իմ Ստրասբուրգ գնալու գումարն է: Ես տարին երկու անգամ Ստրասբուրգ եմ գնում: Մենք պատվիրակության անդամ ենք Եվրախորհրդարանում: Ես Ստրասբուրգ գնում եմ վեց տարի»,- «Առաջին լրատվական»-ի հետ զրույցում ասաց Ջերմուկի քաղաքապետը:
Մեր հարցին` ինչո՞ւ իր գործուղումները քաղաքապետարանի հաշվին չեն, այլ Ջերմուկի զարգացման հիմնադրամի հաշվին, Հովհաննիսյանը պատասխանեց. «Որովհետև քաղաքապետարանի բյուջեն շատ սուղ է, և ես թույլ չեմ տալիս, որ քաղաքապետարանի բյուջեի հաշվին գործուղումների գնամ: Դա լինում է կամ անձնական, կամ հիմնադամի հաշվին»: Հաշվետվության մեջ գրված է, որ քաղաքապետի որդին հիմնադրամից 504 հազար դրամ աշխատավարձ է ստացել: Վ. Հովհաննիսյանի պնդմամբ` դա տղայի տարեկան աշխատավարձն է. «Այնպես որ, համարյա հասարակական հիմունքներով է աշխատում»:
Հարցին` ինչպե՞ս է բացատրում ՀԷՑ-ի շռայլությունը, այն դեպքում, երբ այսօր ասում է, որ ճեղքվածք ունի և էլեկտրաէներգիան բնակչության համար թանկացնում է, Ջերմուկի քաղաքապետը պատասխանեց. «Չեմ կարծում` դա շռայլություն է: Դա եղել է 2012 թվականին, մարդիկ նվիրաբերություն են արել, որի համար մենք մեծ շնորհակալություն ենք հայտնել: Մենք դիմել էինք իրենց, խնդրել էինք քաղաքի լուսավորվածության հետ կապված օգնել»:
Հետաքրքրվեցինք, թե որևէ արտոնություն չի՞ տրվել ՀԷՑ-ին Ջերմուկ քաղաքի հետ կապված, քաղաքապետը պատասխանեց. «Չէ՛, ինչ արտոնություն: Մենք Եվգենի Գլադունչիկին Ջերմուկի պատվավոր քաղաքացի ենք տվել: Ոչ միայն մեր լուսային համակարգերը՝ էլեկտրացանցերը, այլև մեր մալուխային համակարգերը, բոլոր ենթակայանները, Ջերմուկի ճոպանուղու հետ կապված բոլոր էլեկտրամատակարարումը, բոլորը կատարվել է ՀԷՑ-ի կողմից»: Ստացվում է՝ Ջերմուկի պատվավոր քաղաքացի կոչումն արժե 300 մլն դրամ՝ եզրակացրինք մենք: «Չէ՛, ինքը չգիտեր, որ մենք պետք է տանք»:
Ինչպե՞ս է գնահատում էլեկտրաէներգիայի թանկացումը հարցին, Վարդան Հովհաննիսյանը պատասխանեց. «Բարդ ա մեր բնակչության համար: Դա հանձնաժողովի խնդիրն է, դրա համար հանձնաժողով կա: Ո՞վ չի ուզում, որ էժան լիներ»:
Ուշագրավ է նաև, որ Ջերմուկ քաղաքի «Սոցիալ-տնտեսական զարգացման աջակցություն» հիմնադրամը իր հաշվեկշռում եղած կանոնադրական կապիտալից 154 մլն 248 հազար 474 դրամ որպես բարեգործություն նվիրաբերել է Ջերմուկ քաղաքի քաղաքապետարանին` այն դեպքում, երբ հիմնադրամի օգտագործած միջոցների ընդհանուր չափը կազմել է 284 մլն 050 հազար 812 դրամ: «Այդ գումարի գույք է ձեռք բերվել և փոխանցվել է քաղաքապետարանին: Դրանք լուսատուներ են, ամբողջ քաղաքի լուսավորվածությունը, որ փոխվել է ամբողջ քաղաքի, ամբողջ Ջերմուկ քաղաքի լույսերն են, նստարաններն են, աղբամաններ են: Մնացածը գնացել է շինարարության և նախագծային աշխատանքների վրա, եզրաքարեր, ասֆալտապատում»,- ասաց քաղաքապետը:
Թե որքան է Ջերմուկի ՀՀԿ պատգամավոր Աշոտ Արսենյանի ներդրումը հիմնադրամում, Ջերմուկի քաղաքապետը, ով նաև Արսենյանի թեկնածուն էր ընտրություններում, հրաժարվեց ասել: «Դա գաղտնիք է: Մարդիկ կան, որ ներդրում են անում, բայց չեն ցանկանում իրենց ներդրումը հրապարակել»:
Հետաքրքրվեցինք` արդեն Ջերմուկում տուրիստական սեզոնը բացվե՞լ է և մատչելի՞ են արդյոք առողջարանները բնակչության համար: «Կարող եմ ասել՝ այո: Մենք ունենք 3 հազար, 5 հազար դրամից սկսվող հյուրանոցներ, ամենաբարձրը 20-25 հազար դրամ է մեկ անձի համար, բարձրակարգ առողջարանները: Բարձրակարգ առողջարաններում տեղ չկա արդեն, ցածրակարգերում տեղեր կան: Հուլիսի կեսերից էնտեղ կլցվեն»:
Քաղաքապետի խոսքերով՝ Ջերմուկ շատ են գալիս ԱՊՀ երկրներից. «Օրինակ` էսօր դրսում զբոսնելուց տեսա Ղազախստանից, Ղրղզստանից, ռուսներ շատ տեսա: Ռուսաստանում բնակվող մեր հայրենակիցները շատ են գալիս»: