Ադրբեջանի պետական լրատվական գործակալությունը Բակո Սահակյանին ներկայացրել է որպես ԼՂՀ նախագահ: «Այս հարցում երկու մոտեցում կարող է լինել. առաջինը՝ ես սպասում եմ, որ ադրբեջանական լրատվամիջոցները կհայտնեն, թե վրիպակ է, մյուս կողմից` քիչ հավանական է նման հեղինակավոր լրատվամիջոցի համար այսպիսի վրիպակը»,- «Հ2» հեռուստաընկերության «Խոսքի իրավունք» հաղորդման եթերում ասել է թուրքագետ Ռուբեն Մելքոնյանը:
Նրա խոսքերով՝ վրիպակի դեպքում գոնե Խանքենդի կնշեին, ինչպես միշտ անում են ադրբեջանական լրատվամիջոցները: «Այս հայտարարությունն, այս սկանդալային «վրիպակը» դարձել է ներադրբեջանական քննարկումների առարկա, և ներքին երկրաշարժ կլինի: Սա առաջին ծիծեռնակներից մեկը կարելի է համարել, սա ցույց է տալիս, որ Ադրբեջանի ներսում անգամ ոչ իրատեսական հայտարարությունները, մոլագար հակահայկականությունը սկսում է ճաքեր տալ: Սա հասարակության տրամադրությունները շոշափելու կարևոր քայլ է»,- ասել է թուրքագետն ու հավելել, որ ոչ միայն եվրոպական գոծիչների, այլև ադրբեջանցիների մտածելակերպն է սկսում փոփոխությունների ենթարկվել, և փորձում են հաշվի նստել իրականության հետ: Ըստ նրա՝ Ադրբեջանի շուրջ իրավիճակը փոխվեց սաֆարովյան գործարքից հետո, և քաղաքակիրթ աշխարհը չի կարող այդ երկրին նախկինի պես ընդունել: Միջազգային հանրության այսօրվա վերաբերմունքն ու ԵԱՀԿ ՄԽ համանախագահների ծրագրված այցելությունը Ստեփանակերտի օդանավակայան թուրքագետը համարում է «հստակ մեսիջներ»:
Ինչ վերաբերում է հայ-թուրքական հարաբերություններին, ապա Ռուբեն Մելքոնյանը 2015-ին ընդառաջ Թուրքիայի քայլերը երկու մասի է բաժանում` դրական և բացասական: Բացասականն այն է, որ թուրքական իշխանությունները շարունակում են Ցեղասպանւթյան փաստն ուրանալու իրենց ջանքերը, ինչn էլ ավելի կակտիվանա. «Անցած տարի Դավութօղլուն հայտարարել էր, որ իրենց թիրախը Սփյուռքն է, և պատրաստ են գտնել շրջանակների, որ կքննարկեն Ցեղասպանության փաստը»: Սակայն, ըստ նրա, թուրքական հասարակության,մեջ շատանում է մարդկանց թիվը, որոնք պատրաստ են կասկածի տակ դնել Թուրքիայի պաշտոնական տեսակետը, գնալով ավելանում է Թուրքիայում հոդվածների, գրքերի թիվը, որոնցով ընդունվում է Ցեղասպանության իրողությունը:
