ՀՀՇ վարչության անդամ Հարություն Ուռուտյանը «Արթիկ» քրեակատարողական հիմնարկից ազատ է արձակվել միայն նախօրեին` մարտի 17-ի հանրահավաքի օրը, երեկոյան նա մասնակցում էր Ազատության հրապարակում կայացած հանրահավաքին: Հարություն Ուռուտյանը պատասխանեց նաև «Առաջին լրատվական»-ի հարցերին:
– Ձեզ համար անակնկա՞լ էր արդյոք ազատ արձակումը:
– Իրականում անակնկալ էր, որովհետև իշխանություններն անսպասելի քայլ կատարեցին: Իմ կարծիքով, դա պայմանավորված էր ԵԽԽՎ համազեկուցողների այցի հետ, որի ժամանակ նրանք հանդիպեցին Առաջին նախագահին: Իշխանությունների խաղաքարտերը խառնվեցին և ստիպված եղան ազատ արձակել քաղբանտարկյալներին, մանավանդ, որ վաղաժամկետ ազատ արձակման առումով կար իրավական ճանապարհ: Կարծում եմ` եթե համազեկուցողները չայցելեին Հայաստան, կարող է և նրանք անտեսեին: Իսկ համազեկուցողների այս դիրքորոշման վրա մեծ դեր խաղաց Հայ ազգային կոնգրեսի հետևողական պայքարը: Քաղբանտարկյալներիս ազատ արձակման հարցում առաջին հերթին մեծ դեր խաղաց Հայ ազգային կոնգրեսի հետևողականությունը, ճնշումը, միջամտությունը: Եթե դա չլիներ, այսօր դժվար, թե մենք ուրախանայինք:
– Ազատ արձակվելուց անմիջապես հետո Դուք միացաք Կոնգրեսի հանրահավաքին, ընդ որում` հանրահավաքը երեք տարվա ընդմիջումից հետո առաջին անգամ անցկացվեց Ազատության հրապարակում: Ինչպիսի՞ն էին Ձեր տպավորությունները:
– Ես ուրիշ ելք չունեմ, և ընդհանրապես, ազատազրկման մեջ գտնվելու ժամանակ էլ երբեք չեմ դադարեցրել իմ պայքարը` հոդվածներով, հացադուլներով, հայտարարություններով: Եվ ես պայքարելու եմ մինչև վերջ, մինչև մեր հաղթանակը: Եվ վստահ եմ` մեր հաղթանակը շուտով մենք կտեսնենք, կվայելենք մեր երեք տարվա աշխատանքի բերկրանքը: Իսկ Ազատության հրապարակ մտնելն ինձ համար անսպասելի էր:
– Ձեր կարծիքով, ինչո՞ւ են իշխանությունները շարունակում բանտերում պահել քաղբանտարկյալներին:
– Նրանք քաղբանտարկյալներին պատանդ են պահում: Նրանք պարզապես վախենում են տղաներից: Եթե Նիկոլը, Սասունը, Բարեղամյան Արամը և մյուսներն ազատ արձակվեն, շարժումն ավելի կհզորանա: Ինձ ազատ արձակեցին, և դա նոր ոգի տվեց մարալիկցիներին: Բոլորն էին այստեղ ուրախ: Եվ կարծում եմ` եթե ազատ արձակեն նաև մյուսներին, ապա նույնը կլինի իրենց ծննդավայրերում:
– Տեսակետ կա, որ քաղբանտարկյալներին պատանդ պահելով` իշխանությունները ցանկանում են այդպես կոտրել նրանց: Արդյոք դա ստացվո՞ւմ է նրանց մոտ:
– Չեն կարող կոտրել մեր պայքարի ոգին: Ինչ ճնշումներ էլ լինեն, մարդիկ, միևնույն է, դիմակայում են: Եվ սա անձնական պայքար չի, այլ` համաժողովրդական պայքար է, որի արդյունքը շուտով կտեսնենք:
– Իսկ ի՞նչ կմաղթեք դեռ բանտերում գտնվող ձեր ընկերներին:
– Ես մաղթում եմ, որ շուտափույթ միանան մեզ: Ու նաև` առողջություն եմ մաղթում, դա ամենակարևորն է: Այսօր Միքայելյան Սասունը առողջական խնդիրներ ունի, և մաղթում եմ առողջություն:
– Կխնդրեի անդրադառնալ նաև Սերժ Սարգսյանի` Ծաղկաձորում տված հարցազրույցին, որտեղ նա ընդդիմության հասցեին հանդես եկավ դրական շեշտադրումներով:
– Առաջին նախագահի ելույթից հետո իշխանությունները վախեցած են, և դա վախի արտացոլանքն էր: Հրապարակված 15 կետերից ոչ մեկն էլ իրենք չեն կարող իրականացնել, և այս երեք տարիների ընթացքում իրենք միշտ տարբեր խոստումներ են տվել, բայց խաբել են ու չեն իրականացրել: Խաբելով պետություն չեն կառավարում: Այդ խաբելու արդյունքում է մեր երկիրն այս օրին:
– Սերժ Սարգսյանը փորձում է ցույց տալ, թե քայլեր է անում` բարեփոխումների համար:
– Չեն կարող որևէ բարեփոխում անել: Անող էին, թող երեք տարի առաջ անեին: Երեք տարի շարունակ սուտ խոստումներ են տալիս: