Նոյեմբերի 22-ին ՀՀ ԱԺ նախագահ Հովիկ Աբրահամյանը երկկողմ հանդիպումներ է ունեցել Ռուսաստանի Դաշնության Պետական դումայի նախագահ Սերգեյ Նարիշկինի ու ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյի հետ:
ՌԴ Պետական դումայի նախագահ Սերգեյ Նարիշկինի հետ հանդիպման ընթացքում երկու խորհրդարանների նախագահները քննարկել են միջխորհրդարանական կապերի ակտիվացմանը, միջազգային խորհրդարանական կառույցներում համագործակցությանը վերաբերող և երկկողմ հետաքրքրություն ներկայացնող մի շարք հարցեր:
Պետական Դումայի նախագահը հայ-ռուսական միջպետական փոխգործակցության ամրապնդման գործում կարևորել է իր պաշտոնական այցը Հայաստան: Նա անհրաժեշտ է համարել միջխորհրդարանական համագործակցության հետագա խորացումը և զարգացումը, կարևորեց փոխայցերը, ինչը նպաստում է Հայաստանի և Ռուսաստանի միջև բարեկամական կապերի էլ ավելի ամրապնդմանը: Հայ-ռուսական միջխորհրդարանական կապերի զարգացման հարցում պարոն Նարիշկինը կարևոր համարեց ՀՀ ԱԺ և ՌԴ Դաշնային խորհրդի միջխորհրդարանական հանձնաժողովի գործունեությունը, որի առաջիկա նիստը տեղի կունենա նոյեմբերի 29-ին Երևանում: Նրա համոզմամբ` հանձնաժողովի աշխատանքը էապես նպաստում է ՀՀ և ՌԴ միջխորհրդարանական կապերի կայուն և դինամիկ զարգացմանը: Սերգեյ Նարիշկինը շնորհակալություն հայտնեց պարոն Աբրահամյանին ՀԱՊԿ Միավորված շտաբի և ՀԱՊԿ ԽՎ անդամ-պետություննեի պաշտպանության ու անվտանգության հարցերով հանձնաժողովների նախագահների համատեղ արտագնա առաջին նիստը Երևանում բարձր մակարդակով կազմակերպելու և անցկացնելու համար:
ՀՀ ԱԺ նախագահ Հովիկ Աբրահամյանը գոհունակությամբ փաստել է, որ հայ-ռուսական կապերը ակտիվ զարգանում են, ինչին նպաստեց նաև Սերգեյ Նարիշկինի պաշտոնական այցը Հայաստան: ԱԺ նախագահը կարևորեց միջխորհրդարանական կապերի հետագա զարգացումը, միջազգային խորհրդարանական կառույցներում համագործակցության խորացումը: Հովիկ Աբրահամյանը նշել է, որ Հայաստանը մեծ կարևորություն է տալիս ՀԱՊԿ-ի գործունևությանը: Կազմակերպությունը, նրա խոսքով, կայացած ռազմաքաղաքական կառույց է և հետխորհրդային տարածքում կայունության պահպանման կարևոր գործոն: Նրա համոզմամբ՝ բավականին արդյունավետ է նաև ՀԱՊԿ խորհրդարանական վեհաժողովի գործունեությունը: ԱԺ նախագահի կարծիքով` որպես ՀԱՊԿ Խորհդարանական վեհաժողովի ու Կազմակերպության կանոնադիր մարմինների փոխգործակցության արդյունավետ օրինակ կարելի նաև համարել ՀԱՊԿ Միավորված շտաբի և պաշտպանության ու անվտանգության հարցերով հանձնաժողովների նախագահների երևանյան նիստը:
ՀՀ ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ հանդիպման ընթացքում կողմերը քննարկել են միջխորհրդարանական հարաբերությունների զարգացմանը առնչվող այլ հարցեր ևս:
Նույն օրը ԱԺ նախագահ Հովիկ Աբրահամյանը հանդիպում է ունեցել ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյի հետ:
Տիկին Մատվիենկոն ընդգծել է, որ Հայաստանը Ռուսաստանի կարևոր ռազմավարական գործընկերն է և բարձր է գնահատել երկու երկրների նախագահների ներդրումը հայ-ռուսական հարաբերությունների ամրապնդման գործում: Անդրադառնալով հուլիսին Հայաստան կատարած իր պաշտոնական այցին և ջերմությամբ հիշելով այն, նա իր և պատվիրակության անունից ևս մեկ անգամ շնորհակալություն հայտնեց Հովիկ Աբրահամյանին ջերմ ընդունելության համար: Վալենտինա Մատվիենկոն կարևորել է և արդյունավետ գնահատել իր պաշտոնական այցը Հայաստան և նշեց, որ այցից հետո հայ-ռուսական հարաբերությունները թևակոխել են որակական նոր փուլ: Միջպետական կապերի զարգացման հարցում` Վալենտինա Մատվիենկոն կարևորեց միջխորհրդարանական կապերի հետագա խորացումը: ՌԴ Դաշնության խորհրդի նախագահը շեշտեց, որ Ռուսաստանը բարձր է գնահատում ՀՀ նախագահ Սերժ Սարգսյանի գլխավորությամբ ՀՀ իշխանությունների գործունեությունը վերջին տարիներին երկրի առաջընթացի և հայ-ռուսական հարաբերությունների զարգացման գործում և վստահություն հայտնեց, որ այս ամենը գիտակցում է և ըստ արժանվույն կգնահատի Հայաստանի ժողովուրդը:
Պարոն Աբրահամյանը գոհունակությամբ փաստել է հայ-ռուսական փոխգործակցության և միջխորհրդարանական կապերի դինամիկ զարգացումը: Նա շեշտեց, որ Հայաստանը մեծապես կարևորում է Ռուսաստանի հետ տարբեր ուղղություններով փոխգործակցության հետագա խորացումը և ամրապնդումը: Հայաստան- Ռուսաստան համագործակցության ամրապնդման գործում նա նույնպես բարձր է գնահատել տիկին Մատվիենկոյի պաշտոնական այցը Հայաստան: Անդրադառնալով ԱՊՀ ՄԽՎ-ի գործունեությանը` Հովիկ Աբրահամյանը նշել է, որ ԱՊՀ Միջխորհրդարանական վեհաժողովը կարևոր նշանակություն ունի ԱՊՀ անդամ երկրների կյանքում և մեծ ներդրում է ունեցել ազգային օրենսդրության զարգացման, միջխորհրդարանական համագործակցության խթանման, տարածաշրջանում խաղաղության հաստատման գործում: Երկուստեք կարևորվել է ՀՀ ԱԺ և ՌԴ ԴԺ միջխորհրդարանական հանձնաժողովի գործունեությունը:
Հանդիպման վերջում Վալենտինա Մատվիենկոն Հովիկ Աբրահամյանին պաշտոնական այցով հրավիրել է Ռուսաստան:
Հանդիպման ընթացքում կողմերը քննարկել են փոխադարձ հետաքրքրություն ներկայացնող այլ հարցեր ևս:
