Վրաստանի վարչապետ Իրակլի Ղարիբաշվիլին ուրբաթ օրը՝ հունիսի 27-ին, հայտարարել է, որ բացասական հետևանքների չի սպասում ԵՄ-ի հետ Ասոցացման համաձայնագրի ստորագրումից՝ Ռուսաստանի հետ հարաբերությունները հարթելու առումով: Այս մասին գրում է «Գրուզիա Օնլայն»-ը:
Նա նշել է, որ Ռուսաստանի հետ երկխոսությանն «այլընտրանք չկա»:
«Եվրամիության անդամ դառնալու մեր ձգտումը չի հակասում Ռուսաստանի հետ հարաբերությունները հարթելու ձգտմանը»,- ասել է Ղարիբաշվիլին:
Նշենք, որ առաջիկայում նախատեսվում է Վրաստանի և Ռուսաստանի ներկայացուցիչների հանդիպումը, որի ընթացքում կքննարկվի երկրների միջև առևտրական հարաբերությունների ապագան՝ ԵՄ-ի հետ համաձայնագրի ստորագրումը հաշվի առնելով: