«ԼՂՀ իշխանությունը միշտ էլ հայտարարել է, որ բանակցային գործընթացին առանց Արցախի մասնակցության և առանց Ադրբեջանի հետ ուղիղ երկկողմ բանակցությունների, հարցին լուծում տալը անհնարին է և այդ տեսանկյունից Բակո Սահակյանի ասածի մեջ նորություն չկա»,- անդրադառնալով ԼՂՀ նախագահ Բակո Սահակյանի ԵԱՀԿ գործող նախագահի հետ հանդիպումից հետո կայացած ասուլիսի ժամանակ արած հայտարարություններին` կարծիք հայտնեց ԼՂՀ նախկին արտգործնախարար Արման Մելիքյանը:
«Առաջին լրատվականի» հետ զրույցում Մելիքյանը նկատեց, որ Արցախի իշխանությունների հորդորները տեղ չեն հասնում, և դա հավասարապես վերաբերում է ոչ միայն ԵԱՀԿ գործող նախագահին, այլև Հայաստանին և Ադրբեջանին:
«Կարծում եմ, որ պետք է մշտապես և հստակ ասել, որ Մադրիդյան սկզբունքները պաշտոնապես Արցախի հետ չեն քննարկվել, Արցախը դրանց ձևակերպման հարցում մասնակցություն չի ունեցել»,- նշեց Մելիքյանը և հավելեց, որ նման բանակցային հիմքը օգտակար չի լինելու, և պետք է փոխել թե՛ օրակարգը և թե՛ տրամաբանությունը:
Խոսելով հրադադարի ռեժիմի խախտման հետևանքով հայ զինվորի մահվան մասին, որը տեղի է ունեցել ԵԱՀԿ գործող նախագահի Հայաստանում գտնվելու ժամանակ, Արման Մելիքյանը նշեց. «Ինձ մոտ առաջացել է այն տպավորությունը, որ ինչպես Արցախը դուրս մղվեց ռեալ բանակցային գործընթացից, այդ նույն վիճակում այսօր աստիճանաբար հայտնվում է Հայաստանը: Կարծում եմ, որ կա որոշակի ներքին փոխհամաձայնություն Հայաստանի և Ռուսաստանի միջև, և այդ տեսանկյունից Ռուսաստանը Ադրբեջանի հետ ուղիղ բանակցությունների միջոցով փորձում է այդ փոխհամաձայնեցված տարբերակը համաձայնեցնել Ադրբեջանի հետ ևս»:
Ըստ Մելիքյանի` այսօր բանակցությունները վարվում են ռուսների կողմից հավանության արժանացած կարգավորման տարբերակի շուրջ Ռուսաստանի և Ադրբեջանի միջև, իսկ Հայաստանն իր բոլոր հնարավոր զիջումները և դիրքորոշումը ռուսների հետ արդեն համաձայնեցրել է:
«Այդ է պատճառը, որ երբ կայանում է որևէ հանդիպում, որն արդյունք չի տալիս, Ադրբեջանն իրեն իրավունք է վերապահում անգամ փոխհամաձայնեցված հարցերի հետ կապված այնպիսի գործողություններ կատարել, որոնք ցույց կտան, որ այդ համաձայնություններն իր համար առոչինչ են: Եվ հայ զինվորի սպանությունն էլ դրա դրսևորումն է»,- նկատեց ԼՂ նախկին արտգործնախարարը և հավելեց, որ դա վկայությունն է այն բանի, որ Ադրբեջանի և Ռուսաստանի միջև դեռևս համաձայնություն չի կայացել:
