Իրանական Fars լրատվական գործակալության փոխանցմամբ՝ Իրանի նախագահ Մահմուդ Ահմադինեժադը Իսլամական ութնյակի գագաթնաժողովի համար Պակիստան մեկնելուց առաջ լրագրողների հետ զրույցում մեկնաբանել է Իսրայելի ու Պաղեստինի միջև հրադադարի ձեռք բերումը.
«Իսրայելցիների նկատմամբ Պաղեստինի ժողովրդի հաղթանակը ցույց տվեց, որ տարածաշրջանի երկրների միավորման դեպքում ոչ մի երկիր չի համարձակվի ռազմաբազաներ ստեղծել աշխարհի 5000 կետերում: Աշխարհի մի շարք երկրներում, այդ թվում՝ նաև Եվրոպայում ու ԱՄՆ-ում ժողովուրդներին ճնշելն ու նրանց նկատմամբ բռնություններ գործադրելը հասել է իր գագաթնակետին:
Սակայն նրանց բողոքները ոչ ոք չի լսում: Աշխարհում ստեղծվել է այնպիսի իրավիճակ, որ ողջ մարդկային հանրությունը ենթարկվում է ճնշման ու բռնությունների: Մարդկության անվտանգությանն ու երջանկությանը հասնելու միակ ճանապարհը սոցիալական արդարության հաստատումն է: Հակառակ դեպքում մարդկության տաղանդը և ունակությունները չեն կարող արդյունավետ լինել»:
