«Դուք վարչապետի ասածը չեք ընկալել ամբողջության մեջ և այն կոնտեքստում, ինչ ասված էր: Բացարձակ, քաղաքացիական հասարակությանը, քաղաքացիական միավորումներին, հանրության իրավունքների սահմանափակմանը չէր ուղղված: Ընդամենը ուղղված էր նրան, թե ինչպես պիտի հանրությունը, մարդիկ, քաղաքացիները իրենց սահմանադրական իրավունքները, ազատությունները ռեալիզացնեն»,- ասաց արդարադատության նախարար Հովհաննես Մանուկյանը՝ պատասխանելով «Առաջին լրատվական»-ի հարցին, թե ինչպես է պատրաստվում կատարել վարչապետի երեկվա հանձնարարականը, որը վերաբերում էր ակտիվիստների կոմղից նախարարների ու պատգամավորների վրա մանրադրամներ նետելուն և, վարչապետի ձևակերպմամբ, իշխանության ներկայացուցիչներին նվաստացնելու փորձերին:
Հիշեցնենք, որ երեկ վարչապետ Հովիկ Աբրահամյանը կառավարության նիստը սկսելուց առաջ հանդես եկավ հայտարարությամբ՝ ասելով. «Ես անընդունելի եմ համարում ամբոխային մեթոդներով իշխանության ներկայացուցիչներին նվաստացնելու և ճնշելու փորձերը: Ինչպես, օրինակ, պատգամավորների կամ նախարարների վրա մանրադրամների նետումը: Թերևս ոմանք մոռացել են, որ իշխանության ներկայացուցիչները ևս ունեն մարդու բոլոր իրավունքներն ու ազատությունները և ենթակա են պաշտպանության նույն ձևով, ինչ հասարակության ցանկացած անդամ: …Ուստի հանձնարարում եմ արդարադատության նախարարին ու ոստիկանապետին՝ քննարկել այս հարցը և առաջարկել լուծումներ թե՛ օրենսդրական, թե՛ կազմակերպչական»:
«Ես Հովիկ Աբրահամյանի հանձնարարականը պատրաստվում եմ կատարել հստակ, ինչպես որ հանձնարարված է: Պետք է սահմանված ժամկետում ուսումնասիրենք համաշխարհային փորձը, հասկանանք մեր օրենսդրության բացերը և փորձենք մեր Սահմանադրության և համաշխարհային փորձի լավագույն պրակտիկայի վրա ստեղծել օրենսդրական այնպիսի կարգավորումներ, որոնք մի կողմից կապահովեն պատշաճ իրավական հիմք համապատասխան իրավունքների և ազատությունների իրագործման համար և միևնույն ժամանակ կստեղծեն այնպիսի իրավիճակ, որ ուրիշի ազատությունները և իրավունքները ևս չխաթարվեն»,- հավելեց նախարարը՝ միաժամանակ նկատելով, որ «այդ իրավունքներն ու ազատությունները սահմանված են Սահմանադրությամբ, և որևէ մեկը, այդ թվում և արդարադատության նախարարը չի կարող հայտնագործել այնպիսի օրենքներ, որոնք կարող են սահմանափակել այդ իրավունքները: Դա անհնար բան է: Մենք ունենք կայացած սահմանադրաիրավական համակարգ, որը բնականաբար թույլ չի տա նման օրենքների գոյությունը մեր իրականության մեջ»:
Արդարադատության նախարարը լրագրողների հետ զրույցում անդրադարձավ նաև քրեակատարողական հիմնարկներում խոշտանգումների միջոցով ցուցմունքներ կորզելուն, պայմանական վաղակետ ազատման հանձնաժողովի գործունեությանը: Նախարարի խոսքով՝ այդ խնդիրներն իր ամենօրյա ուշադրության կենտրոնում են, և առաջիկայում հանրության համար նկատելի կլինեն արդյունքները:
Մանրամասները՝ տեսանյութում: